Suovašii strippet čáskadanbiktasiiguin

Buollinčáskadeaddjit eai beasa biktasiid geavahit strippemii ge ovdal go sátnejođiheaddji lea guorahallan dávvir-njuolggadusaid ođđasit. (Govva: Youtube neahttasiiddus filmmas coahkkaluvvon)

Kárášjoga buollinhoavda ii oainne váttisvuođa das go su bálvvát čáskadanrusttegiiguin servet dánsut lávdde alde bišku nissoniidda dahje jugahandoaluin. Muhto sátnejođiheaddji ii suova šat maidege luoikat priváhta atnui.

Vihtta dievddu bohtet lávdde ala dušše vuolildusbuvssaiguin ja coggagohtet čáskadanbiktasiid ja oaivesujiid. Sii dánsejit nissoniidda geat biškot ja fáipot lávderavdda badjel juovlafeasttas Kárášjogas. Nu oidno Youtube filmmas mii lea almmuhuvvon internehttii juovlamánus 2009:s. 

Dá lea vel okta ovdamearka dasa movt Kárášjogas geavahit gieldda rusttegiid eará doaimmaide go leat jurddašuvvon, áššit mat leat buktán garra moaitámušaid.  Muhto buollinhoavda Alf Isaksen gal ii ane juste dán nuoladeami vearrás áššin, go bártnit eai lean barggus juste die.

– Gullen maŋŋel ahte bargit ledje searvan diesa, ja mii leat háleštan dan birra. Dajan nu ahte dat lea dahkkon, ii ge dahkko šat nuppes. Nuppi dáfus lea dat maiddái hui buorre ja dábálaš ahte čáskadanveahka searvá feara masa, vai mii leat oidnosis. Mis han galgá maid vehá somá, dadjá Isaksen ja bohkosa vel ahte lei ieš maid vuolgit geahččat jus lei diehtit strippema birra.

Loga eambbo bearjadaga Ávviris.