Váldosiidu-Hovedsiden | Ođđasat | Historjjálaš vuollegaš logut olles Finnmárkkus, muhto: Guovdageainnus lassána buozalmasvuođajávkan

Historjjálaš vuollegaš logut olles Finnmárkkus, muhto: Guovdageainnus lassána buozalmasvuođajávkan

Fonta sturrodat: Decrease font Enlarge font
image DUHTAVAŠ BOHTOSIIGUIN MUĐUI: NAV Finnmárkku Bargoeallinguovddáža ossodaga jođiheaddji, Dagfinn Gjerde, lea duhtavaš go Finnmárkku fylkkas ii leat šat alimus buozalmasvuođajávkan riikkas. Ávvira vuorkágovva

Finnmárkkus ii leat goassege ovdal leamašan nu unnán buozalmasvuođa jávkan go dál lea. Guovdageainnus gal lassána jávkán. Dál áigu NAV dárkileappot geahččat manin Guovdageainnus nu oallugat leat dieđihuvvon buohccin.

NAV Finnmárkku Bargoeallinguovddáža ossodathoavda, Dagfinn Gjerde, muitala logut maid ožžo vuossárgga, čájehit ahte doavtterdieđihuvvon buozalmasvuođajávkan ii leat goassege leamaš nu unnán Finnmárkkus go dál.

Leat dušše guokte gieldda Finnmárkkus mat spiehkastit dán buori govas, namalassii Guovdageainu ja Láhpi.
Gjerdes ii leat vel čilgehus manin Guovdageainnus ja Láhpis lea lassánan, muhto lohká NAV áigut dan buorebut guorahallat.

Historjjálaš vuollegaš
Buozalmasvuođajávkamat Finnmárkkus leat geahpanan 7,2 proseanttain nuppi kvartálas 2010:s gitta 6,7% nuppi kvartálii 2011:s. Dát lea 0,5 proseantačuoggá geahppáneapmi.
 – Dát čájeha ahte buori čuovvolanbarggus lea ávki. Máŋga doaimma barget aktiivvalaččat IA-bargguin. Sáhka leage bargat eastadeaddjin ja systemáhtalaččat, eai gávdno makkárge jođánis ráđit geahpedit buozalmasjávkama, čilge son.
 – Riikadásis čájehit ollu fylkkat buozalmasvuođa lassáneami, muitala Gjerde, muhtimat eai leat rievdan ovddeš iskkadeamis. Finnmárkkus fylkka ii leat ge šat dál  riikka bajimuš buozalmasjávkanstatistihkas.

Guorahallet buorebut
Dagfinn Gjerde lohká váttisin dadjat manin Guovdageainnus lea nu badjin buozalmasjávkan.
 – Dan ii leat buorre diehtit, dat sáhttá maid leat soaittáhagas. Leat máŋga siva manin buozalmasjávkan lassána ja geahppána, čilge son.
 Gjerde lohká loguid ožžon vuossárgga, eaige leat vuos astan guorahallat maidige.
 – Nu ahte mii fertet vuos čohkkedit ja guorahallat buot gielddaid bohtosiid, erenoamážit Guovdageainnu, gávnnahan dihte siva alla buozalmasjávkamii, dadjá son.

Geahččalit čoavdit
Gjerde lohká sin áigut guorahallat manin Guovdageainnus lea nu ollu buozalmasvuohta ovdamearkka dihte Unjárgga ektui.
 – Mus ii leat njuolggo vástádus dasa justa dál, muhto mii áigut váldit dan ovdan Guovdageainnu NAV kantuvrrain ja suohkandoaktáriin, gávnnahit ja geahččalit čoavdit dan váttisvuođa, čilge son.
                                                                                                                                              
Guovdageainnu NAV jođiheaddji ii háliidan vástidit gažaldagaid aviisii, iige Guovdageainnu suohkandoavttir lean gávdnamis ságaide ikte.


  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii