Váldosiidu-Hovedsiden | Ođđasat | – Mii eat leamašan doarvái čeahpit

– Mii eat leamašan doarvái čeahpit

Fonta sturrodat: Decrease font Enlarge font
image Marit Kirsten Anti Gaup hástala dál badjeolbmuid čájehit sii maiddái barget gieldda ovddas ja šaddet eambo oidnosii. – Dan oainnán mun deháleamosin dál, dadjá son. Govven: Inga Marie Guttorm

Kárášjohkalaš Marit Kirsten Anti Gaup, gii lea Vuorji siidda bearašdoalli, lohká son ballá Kárášjoga ođđa gielddastivra ii nagot gozihit boazodoalloáššiid nu bures, go dál eai leat go guokte olbmo beassan gielddastivrii geain lea boazodoalloduogáš.

Kárášjoga gielddastivrii leat guokte nissonolbmo badjedilis beassan, ja Marit Kirsten A. Gaup lohká son ballá dál ahte soai eaba fidne makkárge njunuš posišuvnna, jus goabbáge sudnos beassá posišuvdnii.
 – Mun balan soai šaddaba dušše várrelahttun, dadjá Gaup. Son lohká ahte boazodoalus ii leat mearridanjietna Kárášjoga gielddastivrras ja dat dagaha sutnje veahá heajos dovddu.
Dál vuos ii leat mearriduvvon geat galget ovttasbargat Kárášjoga gielddastivrras. Gaup lohká badjeolbmot Kárášjogas berrejit dál čohkkedit ja háleštit mo galgá boahtteáiggis dohppet daid hástalusaid mat leat gielddas.
 – Go dál leat šaddan minoritehtan sápmelaččaid gaskkas. Nu lea mu dovdu dál, dadjá son. Gaup lohká sii badjeolbmot leat seamma čeahpit ja lea maiddái seamma ollu oaivilat go muđui gieldda olbmuin. Go Gaup lohká njunuš posišuvnnaide, de oaivvilda son ovdamearkka dihtii dispalávdegottis berre leat olmmoš geas lea boazodoalloduogáš.
 – Dispalávdegoddi lea hui dehálaš boazodollui, muhto seamma dehálaš lea beassat eará lávdegottiide maid vai beassat leat mielde álggus juo geahčadit ja meannudit áššiid, dadjá son. Gaup oaivvilda dál sáhttá šaddat nu ahte ii gullo sin jietna go ii soaitte oktage beassat njunuš posišuvnnaide makkárge lávdegottis, maid son oaidná hui dehálažžan.

Gildii maid buorre
Gaup lohká dál lea dehálaš čájehit ahte boazodoallu sáhttá doaimmahit buori barggu gildii, iige dušše sin iežaset áššiid gozihit. Seammás lohká son lunddolažžan ahte boazodoallu goziha iežaset bargguid.
 – Badjeolmmoš gal maid áigu dahkat buori gildii, iige dušše bargat iežas ovddas. Dan oainnán mun hástalussan ahte álbmot fuobmá, dadjá Gaup.

Eai doarvái čeahpit
Marit Kirsten A. Gaup ii loga sin doarvái čeahppin ovddidit iežaset válgagičču oktavuođas. Son lohká iežas hástalit sin boazodoalus, geat servet listtuide válgga oktavuođas, váruhit ahte bohtet nu bajás listtus ahte lea vejolašvuohta beassat gielddastivrii.
 – Iige dušše deavdima várás bidjat iežas nama listui, dadjá Gaup. Marit Kirsten A Gaup geassádii diibmá Bargiidbellodaga sátnejođiheaddjievttohussan, muhto ii loga iežas gáhtat, vaikko oaidná dál ahte eai leat go guovttes geain lea boazodoalloduogáš, beassan gielddastivrii.
 – In gáđa go lei munnje dat rievttes mearrádus, dadjá Gaup.

Čeahpibun boahtit oidnosii
– Boazodoallu ii leat leamašan oidnosis dál válgagiččus, oaivvilda Gaup, ja lohká dál fertejit boazodoallit ieža geahčadit mo sáhttet šaddat čeahpibun leat eambo oidnosis.
 – Mii eat leat doarvái čeahpit čájehit álbmogii ahte mii maiddái leat čeahpit politihkas, dadjá Marit Kirsten Gaup. Son lohká dál fertejit sii boazodoalus jo geahčadišgoahtit ja čájehišgoahtit buori gova álbmogii, vai boahtte gielddastivraválggas leat eambo áirasat geain lea boazodoalloduogáš.
 – Mun dieđán ja oainnán mis leat máŋga čeahpes politihkkara boazodoalus, sihke nuorat ja vuorrasit olbmot, dadjá son.
 

  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii