Váldosiidu-Hovedsiden | Ođđasat | – Lei erenoamáš jienastit

– Lei erenoamáš jienastit

Fonta sturrodat: Decrease font Enlarge font
image Bargiidbellodaga sátnejođiheaddjievttohas Solveig Boine Nikkinen oaidná dehálažžan ahte olbmot addet iežaset jiena, nu son ge dagai ikte. Son lohká erenomáš dovddu alddis dán jagi go ieš lea Bargiidbellodaga sátnejođiheaddjievttohas.

Ikte ovtta áigge jienastii Bargiidbellodaga sátnejođiheaddjievttohas Solveig Boine Nikkinen.

Kárášjoga servodatviessu lei maiddái dán jagi fylkkagieldda- ja gielddastivraválgga jienastanbáiki, ja Kárášjoga Bargiidbellodaga sátnejođiheaddjievttohasa, Solveig Boine Nikkinena, mielas lei ikte erenomáš jienastit go ieš lea sátnejođiheaddjievttohas.
 – Áibbas dehálaš jienastit min servodagas ja ahte buohkat leat mielde. Orui hui buorre dovdu mus, dadjá Nikkinen. Nu attii Nikkinen iežas jiena dán jagáš fylkkagielddaválgii ja gielddastivraválgii. Kárášjoga sátnejođiheaddjievttohasat ledje muđuid servodatviesus jienastanlogu čállimin ja muhtumat ledje válgagiččus servodatviesu olggobealde.

Dássedit olbmot
Jienastanstivrra jođiheaddji, Biret Dagny Anti, lohká dán jagi leamašan dássedit olbmot iige sis leamašan jaskat. Ikte ovdal ovtta áigge maŋŋágaskabeaivvi lei 40 proseantta álbmogis jienastan ja čuođi eambbosat ledje jienastan ovdagihtii.
 – Háliidan dieđusge juksat ovddit válga bohtosa mii lei 60.90 proseantta. Doaivvun mii nagodat joavdat 70 prosentii, dadjá Anti.  

Nuorat ja mánát
Kárášjoga servodatviesus fitne maiddái mánáid- ja nuoraidskuvlla oahppit, ja Biret Dagny Anti lohká vuohttán stuorát beroštumi mánáin ja nuorain dán jagi go mannan válgga.
 – Hui ollugat jearahit mii lea ja mo galgá dahkat, ja nu čájehit eambo beroštumi válgga ektui, dadjá Anti. Ole Máhtte Nedrejord vázzá logát luohkás ja son finai geahččamin ja oahppamin mo galgá jienastit. Son lohká dan dehálažžan go boahtte válggas beassá son ieš jienastit.
 – Somá oaidnit ja háleštit sátnejođiheaddjievttohasaiguin, dadjá Nedrejord.

Dehálaš jietna
Ole Máhtte Nedrejord maid oaidná dehálažžan ahte 16 jahkásaččat galggaše beassat jienastit.
 – Nuoraid oaivilat livčče seammá dehálaččat ja mii maid háliidat mielde mearrideamis, dadjá Nedrejord. Jan Egil Høgden, gii maiddái vázzá logát luohkás Kárášjogas ja ieš lea aktiivvalaš politihkas, oaidná maid dehálažžan ja ovdamunnin jus nuorat beasaše jienastit.
 – Livččii ovdamunni eambo nuoraide bargat aktiivvalaččat politihkas. Nu boađáše nuoraid oainnut maid eambo oidnosii, dadjá Jan Egil Høgden. Sihke Nedrejord ja Høgden logaiga ikte diehtit makkár bellodaga/listtu livččiiga jienastan.



  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii