Váldosiidu-Hovedsiden | Ođđasat | Melodi Grand Prix junior: Emma luohttá alcces

Melodi Grand Prix junior: Emma luohttá alcces

Fonta sturrodat: Decrease font Enlarge font
image Guovdageaidnulaš Emma Elliane lea juo hárjehallagoahtán Melodi Grand Prix juniorii, muhto sus goitge lea dilli kvártta humadit Ávviriin.

ČÁFFAT: Emma Elliane Oskal Valkeapää lávlla lea dan birra ahte galgá luohttit alcces. – Luohttit han gal ferte alcces, lohká Emma Elliane Ávvirii, dá olggobealde Oslo Spektruma, gos lávlungilvu galgá lágiduvvot. Sus lea juste kvártta áigi humadit Ávviriin ja vástida gierdavaččat jearaldagaid. Inga Ragnhild Holst govven

– Lávlla «Don» lea dan birra ahte luohttit alcces, muitala Emma Elliane Oskal Valkeapää Ávvirii. Son loktesta gieđaid áibmui ja moddje čábbát. Iešluohttámuš gal lea vaikko son ii leat go 11 jahkásaš.
 – Mis lea leamaš lávdegeahččaleapmi odne ja dat manai bures. Koreográfa oahpahii min dánset ja odne leat mii oahppan movt geahččat kamerai, dadjá Emma Elliane.
– Nagodat go muitit lávllateavstta, dánsenduolmmastagaid ja movt geahččat kamerai?
– Mun láven gal muhtumin vajálduhttit, vástida son. Alcces goitge ferte luohttit.

Garra gilvu
Loahppavuorru lea ihttin lávvordaga. Badjelaš 600 máná sáddeje lávlagiid dán stuora lávlungilvui. 23:s besse vuolgit auditionii Oslos, muhto dušše logis besset searvat loahppagilvui mii sáddejuvvo TV:s.    Melodi Grand Prix junior (MGP jr.) álggahuvvui 2002:s ja lei Danmarks radio mii vuolggahii dan. Jurdda lei ráhkadit albma alternatiivva nuorra MGP-artisttaide.
 Norga lea searvan dasa 2002 rájes ja 2006:s soabadedje Davviriikkat ráhkadit sierra, jahkásaš finála – masa guokte buoremusa buot riikkaid našuvnnalaš finálain beassaba searvat. Jus galgá beassat searvat nuoraid MGP:i, de ferte gaskal 8 ja 15 jahkásaš (ii deavdán 16 ovdal našuvnnalaš vuoru), ja ferte ieš čállán sániid ja šuoŋa.
 – Leatge oalle garra gáibádusat. Dáppe leat olu čeahpes artisttat geat dál hárjehallet Oslo Spektrumis, čilge Emma Elliane ja lasihastá:
– Mun jáhkán Erlendas (Guttulsrud Kristiansen, 14 jahkásaš, doaim.meark.) ja Svalas (Rosenløw Eeg, 12 jahkásaš) leat buorit vejolašvuođat..

– Movt don jáhkát iežat vejolašvuođaid?
– Jáhkán mus lea maid buorre vejolašvuohta, dadjá son profešuvnnalaččat. – Jus vuoittán, de oaččun pokála ja olu ilu, dadjá son.

Vuosttaš nuorra sámi artista MGP jr:s
Buohkat geat áŋgiruššet sámegielas berrejit fuomášit ahte Emma Elliane lea vuosttaš MGP jr.  historjjás gii lávlu olles lávlaga sámegillii. Ovdal lea Unjárgga joavku The Blacksheeps lávlon muhtun osiid sámegillii lávlagis ‹‹Oro jaska beana›› mainna vuite maiddái davviriikkalaš MGP jr.
 Ollesolbmuid MGP:s, dahje Eurovision Song Contest, nu go dál lea namma, lea dušše okta sápmelaš oassálastán, namalassii Mathis Hætta, go juoiggai «Sámiid Ædnan» lávlagis riikkaidgaskasaš finálaš 1980:s.
 Emma Elliane mielas ii leat dat nu earenoamáš, ja eatnis neavttár Sara Margrethe Oskalis, leat oaivilat.
 – Ii dat leat nu eksohtalaš. Sámegiella ja dárogiella han leat dássálas gielat, dadjá son.

Eai leat sámi artisttat geat inspirerejit nuorra lávlu:
 – Mu oiddohat leat Rihanna, Nicki Minaj ja Britney Spears.
Vaikko dát beakkán artisttat dál leat su ovdagovat, de ii soaitte son čuovvut dáid stuora násttiid luotta.
 – Mun várra háliidivččen šaddat hábmejeaddjin. Biktasiid dahje buriid hutkosiid hábmet, dadjá son.

MGPj čájehuvvo NRK:s diibmu 19.55 rájes.


  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii