Váldosiidu-Hovedsiden | Ođđasat | Biilaheivehanossodat heaittihuvvo – Dát čuohcá munnje

Biilaheivehanossodat heaittihuvvo – Dát čuohcá munnje

Fonta sturrodat: Decrease font Enlarge font
image Anders Edvard Eriksen šaddá dás duohko mátkkoštit gitta Romsii, go galgá divuhit iežas biilla, mii lea persovnnalaččat heivehuvvon sutnje. Dát lea okta váikkuhusain go Finnmárkku áidna Handicare biilaheivehanossodat galgá heaittihuvvot. Govas leage Eriks

Handicare áidna biilaheivehanossodat Finnmárkkus galgá dál heaittihuvvot, ja lagamus heivehanossodat finnmárkulaččaide šaddá Romssas. Geavaheaddji, Anders Edvard Eriksen, lohká dán ortnega garrasit čuohcat sutnje.

Anders Edvard Eriksen lea 2003 rájes leamašan juvlastuollogeavaheaddji, ja lea 2005 rájes vuodján biillain mii sutnje lea persovnnalaččat heivehuvvon, sihke heaissain ja iešguđetlágan elektronihkain. Biila, mii lea dárbbašlaš sutnje árgabeaivválaš eallimii, lea heivehuvvon Leavnnjas, ja doppe son maid lea divuhan biilla. Dál šaddá Eriksen mátkkoštit gitta Romsii, go Handicare áidna biilaheivehanossodat Finnmárkkus galgá heaittihuvvot.  
  – Munnje šaddá hui lossat mátkkoštit gitta Romsii go orun Álttás. De šattan mun dás duohko álo bivdit nuppi olbmo vuolgit veahkkin, go njulgestaga šaddá munnje beare guhkki okto vuodjit Romsii, go lea nu lossat go dušše sáhtán gieđaid geavahit vuodjimii, lohká Eriksen Ávvirii, gii lea beahtahallan ođđa ortnegiin.

Álki
Eriksen muitala ahte son láve šaddat sullii guktii jagis divuhit biilla, ja lohká leamaš álkin dan dahkat Leavnnjas.
 – Leavdnja lea hui guovddážis go lea gasku Finnmárku, ja dohko láve hui álki vuojistit. Dohko láven bures nákcet okto vuodjit, ja ii láve gártat go beaivemátkin munnje, lohká Eriksen, gii boahtá váillahit dán fálaldaga. Dál lohká son ahte ii šatta šat dat seamma, go ferte vuolgit gitta Romsii divuhit iežas biilla.
 – Dál šattan maiddái idjadit go dohko galggan vuolgit, ja nu šaddá mátki olu váddásabbo munnje, lohká vuollánan Eriksen.

Geavaheaddjit
Eriksen lohká ahte ođđa ortnegii ferte gávdnot buoret čoavddus, go dan ahte geavaheaddjit Finnmárkkus šaddet nie guhkás mátkkoštit.
 – De gal juo fertejit divuheaddjit mátkkoštit geavaheddjiid lusa, ja boahtit deike min veahkehit, lohká son. Eriksen muitalage ahte nu lea máŋgii ovdal dahkkon go su biillas leat leamašan sivat.
 – Leavnnjas leat máŋgii boahtán mu veahkehit go biillas lea leamašan sivva, ja dat lea leamašan hui álki. Mu mielas lea maid Handicare Leavnnjas obbalaččat doaibman hui bures, ja doppe leat hui čeahpes bargit, rámida Eriksen. Son ballá ge dál, go Romsii šaddá mannat divuhit biilla, de dat maid čuohcá dan buori veahkkái maid son dán rádjái lea ožžon.
 – In jáhke Romssas addet seamma buori veahki go dan maid Leavnnjas dahket, go doppe leat eanet geavaheaddjit, ja olu stuorát guovlu mii gullá sin vuollái, dadjá Eriksen.
Handicare Romssa vuollái gullá ge de sihke Romsa, Finnmárku, ja oasit Nordlánddas.

Dilli rievdan
Norgga Handicare doaibmajođiheaddji, Roald Henriksen, duođašta ahte Handicare biilaheivehanossodat Leavnnjas galgá heaittihuvvot.
 – Juo, dat doallá deaivása. Sivvan dasa lea go NAV lea rievdadan struktuvrra, ja mearridan ahte biilaheivehanossodagat dušše galget viđa sajis Norggas, nammalassii stuorra gávpogiin, lohká Henriksen. Son maid šálloša go geavaheaddjit dál šaddet vuolgit gitta Romsii.  
 – Lea dieđusge šállošahtti go Leavnnja ossodat heaittihuvvo, muhto mii bargat dan ovddas ahte geahččalat gávnnahit buriid čovdosiid maiddái geavaheddjiide, lohká Henriksen, gii ii sáhte dađi eanet dadjat juste dán birra. Son maid muitala ahte doalahit guokte olbmo biilaheivehanossodagas Leavnnjas, ii leat vuođđu.
 – Nu mo dál lea dilli de ii leat doarvái dárbu ossodahkii, ahte nagodat barggahit guokte olbmo dáinna bargguin, čilge Henriksen.

Ii diehtu
Henriksen muitala ahte ii leat vel diehtu goas biilaheivehanossodat Leavnnjas heaittihuvvo.
 – Eat dieđe vuos goas dat dáhpáhuvvá, muhto diehtit sihkkarit ahte dat dáhpáhuvvá, lohká Henriksen, ja muitala ahte maŋŋel beassážiid galgá NAV árvvoštallat ášši, ja dalle dihtet goas Leavnnja ossodat heaittihuvvo. Henriksen muitala dan seammás ahte vaikko vel ieš biilaheivehanossodat heaittihuvvo, de lea Handicare bealis liikká dáhttu ahte ossodagas maid áigot heaittihit, ain galgá leat juogalágán doaibma.  
 – Mii sávvat ahte nagodit bisuhit fálaldaga beassat divuhit biillaid, vaikko heiveheapmi aŋkke heaittihuvvo. Ii mihkkege dattetge mearriduvvo ovdal go NAV árvvoštallá ášši, lohká Henriksen.
  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii