Váldosiidu-Hovedsiden | Ođđasat | Mama Sara guoddalii doarjjahilgumuša: Norad ii váldán vuhtii

Mama Sara guoddalii doarjjahilgumuša: Norad ii váldán vuhtii

Fonta sturrodat: Decrease font Enlarge font
image – Bivdit álbmogis ruhtadanveahki, vai mii ovttas beassat ollašuhttit ulbmila ahte geafes Maasai mánat Loliondos, ožžot ođđa skuvlla, čállá Mama Sara veahkkeorganisašuvdna preassadieđáhusas maŋŋel go Norad ii váldán vuhtii Mama Sara guoddaleami doarjjahilg

Norgga Ovdánahttinovttasbargodirektoráhtta, Norad, ii váldán vuhtii Mama Sara veahkkeorganisašuvnna guoddaleami ja doalahii hilgumuša doarjut skuvlahuksenprošeavtta Tanzanias. – In ádde mearrádusa, dadjá Mama Sara veahkkeorganisašuvnna stivrajođiheaddji, Ragnhild Lydia Nystad, Ávvirii.

Ávvir čálii guovvamánus ahte Norad ii juolludan doarjaga ‹‹Mama Sara Education Foundation for Maasai Children›› veahkkeorganisašuvdnii skuvlahuksenprošektii Loliondos, Tanzanias, Afrihkás. Mama Sara veahkkeorganisašuvnna stivrajođiheaddji, Ragnhild Lydia Nystad, lei dalle sakka šlundon danin go ii lean ovttaoaivilis Norada ákkaide hilgut ohcamuša ja logai áigut guoddalit mearrádusa.

Ii miehtan
Norad mearridii njukčamánu álggus ahte hilgut guoddaleami ja doalahit mearrádusa ahte ii doarjut Mama Sara veahkkeorganisašuvnna.
 – Šállosat garrasit ahte Norgga Stáhta ii doarjjo prošeavtta maid eamiálbmogat, Sámit ja Maasaiat, ieža leat álggahan ja dássážii lihkostuvvan bures, lohká Nystad preassadieđáhusas.

Ii gávdno
poastalistus 

Norad čállá ahte ášši sáddejuvvo viidáset Olgoriikadepartementii loahpalaš mearrideapmái, guoddalannjuolggadusaid vuođul. Ávvir lea ohcan sihke Norada ja Olgoriikadepartemeanta boastalisttuin, muhto Mama Sara guoddaleapmi ii oidno Olgoriikadepartementii iige Norada boastalisttus. Ii Olgoriikadepartemeantta boastavuorká ge gávdnan guoddaleami go Ávvir riŋgii ja áiggui gulahallat Noradin gosa guoddaleapmi leažžá šaddan dahje lea go oba sáddejuvvon ge.

Norad  biehttala ákkastit
Norada Siviila servodat-ossodaga vuolitdirektevra, Gunvor Skancke, aŋkke lohká sin leat sádden guoddaleami viidáset Olgoriikadepartementii.
 – Mii sáddiimet Mama Sara veahkkeorganisašuvnna guoddaleami Olgoriikadepartementii njukčamánu 28. beaivvi, maŋŋel iežamet meannudeami guoddaleamis. Ávvir jearrá Skanckes manne Norad leat doalahan guoddaleami.
 – Dat lea danne go leat ođđa árvvoštallamiin leat boahtán seamma vástádussii. Muđui in áiggo digaštallat ášši sisdoalu danne go lea dál meannuduvvome Olgoriikkadepartemeanttas, dadjá Skancke dušše.

– In ádde
Nystad lohká Ávvirii ahte son ii oaččo Norada hilgumuša ipmárdussii.
 – In ádde mearrádusa. Mii han lea justte rahpan skuvlla vuosttaš oasi man leat erenomaš jođánit huksen. Dál fertet joatkit ruhtačoaggimiin, nugo leat dássážii birgehallan, ja dat gal boahtá ájihit. Mii eat leat dán rádjái maidige ožžon Noradis, šálloša Ragnhild Lydia Nystad.

‹‹Mama Sara›› imašta
Mama Sara ieš, Gutnel Biret Sara Buljo, iige loga ipmirdit hilgumuša danne go sii leat addán buot dieđuid Noradii maid gáibidedje.
 – Lea ártet ahte Norga ii juollut doarjut dan mii mu dieđu mielde lea áidna čielga norgalaš Sámi prošeakta mii solidaritehtain doarju álgoálbmoga olgomáilmmis. Noradis eai lea eará álgoálbmotprošeavttat máilmmis justte dál, dadjá Sara Buljo.
  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii