Dakkár namahus go Lulli-Sámi nieiddas Sara Hermanssonis ja Čorgaša boazodoallis Ailo Utsis lea dál, ii leat earáin. Soai nammaduvvuiga Tråante 2017 toargameašttirin njoarosteamis. GEAHČA VIDEO!
Sámi Valáštallanlihttu – Norga (SVL-N) lágidii njoarostangilvvuid Tråante 2017 oktavuođas Troandima toarggas. Beaivebotta besse buohkat searvat gilvvuide geat háliidedje, ja SVL-N jođiheaddji Kåre Olli muitala buohkaid, sihke sápmelaččaid ja earáid, áŋgirit searvan gilvvuide.
– Mii leat beaivebotta leamašan toarggas ja olu olmmoš lea bisánan min luhtte ja maid searvan gilvvuide.
Čalmmustahttit ja dieđuid juohkit
Toargagilvvuin ii leat njoarostančehppodat buot deháleamos. Lágideaddjit leat gilvvuin háliidan čalmmustahttit dán earenoamáš sámi gilvvohallanvuogi ja maid juohkit dieđuid birra.
– Mii leat sihke mánáide, nuoraide ja rávisolbmuide, geat leat bisánan min luhtte, beassan muitalit sámi valáštallama ja SVL-N doaimmaid birra, muitala Olli.
Gilvovuoigŋa badjin
Vaikko leat eahpeformála gilvvut, de lei gilvovuoigŋa badjin go finálat álge loahppabeaivvi. Finálaide besse dat njeallje njoarosteaddji sihke nissoniid- ja dievdduidluohkás geat eanemus čuoggáid ledje čoaggán álgovuoruin.
Nissoniid finálas deaivvadeigga Sara Hermansson ja Laila Somby. Nuorra Lulli-Sámi nieida, Sara, čájehii jođánit makkár suohpangiehta son lea, ja vuittii ge nissoniidluohká.
(Ášši joatká gova vuolde)
Toargameašttir
Dievdduid beallefinálii ledje beassan Hans Arild Holmestrand, Nils Michael Åhren, Lasse Wigelius ja Ailo Utsi. Buot njealjis njoarostedje bures beallefinálain, muhto loahpa loahpas šattaiga goit Jergul-meašttir Holmestrand ja Ruoŧa suohpangiehta Åhren, nu go ieža leaikkastalaiga ahte leaba, dán háve vásihit časkkáhallat. Finálas deaivvadeigga Lasse Wigelius ja Ailo Utsi. Vaikko iežas mielas ii njoarostan bures, de loahpa loahpas nammaduvvui goit Áilo Utsi Tråante 2017 toargagilvvuid meašttirin.
(Ášši joatká gova vuolde)
– Livččii sáhttán mannat buorebut ja ledjen sáhttit jođáneappot njámmat suohpana, in addán buot maid livččen sáhttán, dušše «beallemašiinnain» mannen, bogostalai dievdoluohká vuoiti, Ailo Utsi.
