-Almmuhus-
-Almmuhus-
-Almmuhus-
VÁLGGAT 2023GuovdageaidnuJohan Vasara ja Márjá Hætta Eira bajimusas

Johan Vasara ja Márjá Hætta Eira bajimusas

-

-

Guovdageainnu Bargiidbellodagas lea ovddeš stáhtačálli sátnejođiheaddjeevttohassan. Várresátnejođiheaddjin evttohit ges olbmo gii lea áibbas ođas politihkas. 

Duorastat eahkeda lea Guovdageainnu Bargiidbellodat nominašuvdnačoahkkimis válljen ovddeš sátnejođiheaddji ja stáhtačálli Johan Vasara iežaset sátnejođiheaddjeevttohassan válgaáigodahkii 2023–2027.

– Leat ožžon buori válgaprográmma Guovdageainnu ovddas. Válgalistui lean ožžon 20 čeahpes ja servodatberošteaddji olbmo mielde. Lea buorre seaguhus hárjánan ja ođđa olbmuin. Márjá Eira válljejuvvui várresátnejođiheaddjeevttohassan, ja fárrolaga listtuin mun sávan ahte mii dahkat buriid válggaid go suohkanválggat bohtet čakčamánus, čállá Johan Vasara. 

Robeka garvit

Vasara lohká Ávvirii ahte deháleamos su mielas livččii bisuhit suohkana ekonomiija badjin maŋŋel stuora goluid  jus beassá sátnejođiheaddjestullui čohkkedit čakčat.

– Ođđa skuvla lea mielddisbuktán stuora loatnagoluid ja munnje šaddá deháleamos sihkkarastit čorgadis ruhtadili suohkanii vai nákcet doalahit buriid bálvalusaid álbmogii ja oadjebasvuođa suohkanbargiid ektui. Suohkandirektevra lea maid dadjan ahte mis bohtet leat ruđalaš hástalusat jus ii mihkke dahkko, dadjá son. 

Várresátnejođiheaddjis ii politihkalaš duogáš

Várresátnejođiheaddjeevttohassan lea Márjá Elise Hætta Eira. Vasara lohká su čeahpes olmmožin geas lea olu hárjáneapmi hálddahuslaš barggus ja muđui olu máhttu ja diehtu servodaga birra.  

Eira lea bargan oahppohoavdan Sámi Allaskuvllas, jođihan NAV kantuvrra Guovdageainnus ja jođiha dál Nannet prošeavtta mii galgá ásahit boazodollui resursaguovddáža ja ráđđeaddi.

Sus ii leat politihkalaš duogáš, go lea hui aitto álgán politihkket. Muhto son lohká vuolgán buriin mielain nie bajás listui Bargiidbellodahkii go jerrui dasa. 

– Lean gullan ahte muhtin bellodagain leat olu politihkalaš spealut, muhto mis eai leat dat Bargiidbellodagas. Mii leat «teama», stuora joavku geat bargat vai min beaggin šaddá vel buoret go dál lea, ja nanusmahttit sámi beali. Mun lean bargovásáhusa bokte oaidnán ahte Bargiidbellodat heive munnje buoremusat, mu oaiviliidda ja olbmuid sámi riektesihkarvuođa geahčestagain, dadjá son. 

Rámis go ožžot Vasara ruoktot

Eira lohká iežas leat dakkárin gii guldala maid olbmot dadjet, ja háliida olu guorahallat máŋga beali ovdal go dahká mearrádusaid. Su mielas lea hui buorre go Vasara lea sin sátnejođiheaddjeáirras, go sus lea buorre máhttu politihkas ja lea njuovžilis olmmoš. 

– Das lea hui vuogas málle leat olmmožin, ii ge duolmma ovttage. Lean hui rámis go leat ožžon su deike go son šaddá álbmogii ávkin ovddosguvlui. Mu mielas lea buorre duogáš ja máŋggabealatvuohta sis geat leat listtus, dadjá Eira. 

Guovdageainnu Bargiidbellodaga listu suohkanválggaide 2023

1. Johan Vasara

2. Márjá Elise Hætta Eira

3. Nils Arne Hætta 4. Inger Marit Bongo 5. Klemet Utsi 6. Ann Britt Eira Sara 7. Jørn Erik Furuly 8. Kirsten Berit Hætta 9. Mai Britt Eira 10. Jan Even Hætta 11. Isak Mathis Buljo 12. Marit Breie Henriksen 13. Anna Margrete Bær Hætta 14. Per Nils Saari 15. Susanne Elisabeth Siri 16. Marit J. Gaup 17. Johan Mathis N. Hætta 18. Svanhild Camilla Utsi 19. Nils Johan Gaup 20. Isak J. Turi

-Almmuhus-