Viimmat golli Sápmái …ja nieiddat vuite nuppi spáppačiekčama

De viimmat lei sámiid ávvubeaivvi AWG-gilvvuin Kanadas. Sámi lunta Emil Dragvik Bakken vuittii Sámi vuosttaš golli, Jussi Rytky vuittii silbba ja Øyvind Eriksen ges vuittii bronssa. Sámi spábbačiekčannieiddat derpe ges Alaska 4-3.

Emil Dragvik Bakken lea ilus go čuoiggái vuosttaš golli Sápmái dáin gilvvuin.
 – Lea nu suohtas go manai nu bures. Illá báljo jáhkán ahte lean vuoitán, muhto dál lean ožžon gollemedáljja ja dál gal duođai jáhkkan, čilge gollevuoiti Emil Dragvik Bakken. Seamma luohkás vuittii Unjárgga lunta Øyvind Eriksen ges bronsamedáljja.
 – Lei suohtas vuoitit bronssa go Emil han čuoiggai mu meattá ja dalle dihten ahte Sápmi vuoitá go mun han čuigen iežan mielas hirbmat bures. Emilis lei nu leaktu ahte mus ii lean vejolašge čuovvut su, muitala ilolaš Øyvind Eriksen.

Sámi čuoigi gáhčái
Sámi AWG-joavkku jođiheaddji Aslak Paltto muitala ahte Fredrik Johnsen gahčai sirrenčuoigamis.
 – Dat lei hirbmat vahát go nu geavai. Fredrik han čuoigá seamma luohkás go Bakken ja Eriksen, ja mis livččii leamaš buore vejolašvuohta vuoitit buot golbma medáljja dán luohkás, dadjá Paltto.

Sámi silbalunta
13 jahkásaš Jussi Rytky, gii lea eret Haapavesi nammasaš báikkis olggobealde Oulu, lea duođai šaddan Sámi silbaluntan. Son vuittii sámiid vuosttaš medáljja dáin gilvvuin ja dal faskii fas silbba sprintačuoigamis.
 – Mun lean duhtavaš go lean vuoitán fas silbba. Jurddaš, mun lean guovtti beaivvis vuoitán guokte silbba ja dat lea mu mielas buorre. Oktasaš čuoigamiin, mat leat duorastaga, de gal ferten geahččalit vuoitit golli, muitala Jussi Rytky ja lasihastá:
 – Mu mihttu lea vuoitit golli. Jus dan dagan, de gal lean lihkolaš.

Nieiddat eai vuos lihkostuvvan
Aslak Paltto dovddaha ahte nieiddat eai leat vel lihkostuvvan  dáin gilvvuin.
 – Dattetge jáhkán ahte sii maid vuoitigohtet dáppe, go sii han leat buorit. Sis lea lihkka buorre vejolašvuohta vuoitit go lunttain, dadjá Paltto ja joatká:
 – Mis lea ihttin vuoiŋŋastanbeaivi. De besset dieđusge nieiddat hárjehallat duorastaga oktasaščuoigamii. Mun gal bealistan einnostan ahte dat manná bures, go nieiddat gal maid vuitet medáljjaid dáppe.

Spábbačiekčit vuite fas
Sámi spábbačiekčan joavku maiddái birge erenoamáš bures. Nieiddat časke Alaska 4-3 iežaset nuppi čiekčamis. Dál lea ge Sápmi vuosttaš sajis iežaset luohkás, go leat vuoitán goappeš čiekčamiid. Nieiddat ledje ráhkkanan bures dán čiekčamii. Sii dihte bures ahte Alaskas lea maid buorre joavku. Nieiddat eai lean čiekčan eanet go moadde minuhta go Alaska oaččui vuosttaš moala.
 Orui dego Sámi joavku moivi veaháš ovdal go čiekčagohte bures. Golaige olles ovcci minuhta ovdal go Máret Silja Blind coggalii iežas vuosttaš moala ja maŋŋel dan manai son vuoiŋŋastit.  Go fas bođii čiekčat, de bážii son nuppi moala. De bat Sápmi lei ovddabealde 2-1. Dat dego bovttii Sámi nieiddaid go sii hui bures čiekčagohte ja Kristina Hansen dagai Sámi goalmmát moala ja boađus de lei 3-1.
 Alaskas ledje maid jođánis ja buorit čiekčit. Sii eai lean gal vuollánan go sii dahke moala ja de lea fáhkka 3-2. Das maŋŋel oaččui fas Máret Silja Blind vejolašvuođa ja son nahkehii spáppa mollii ja de lei 4-2 Sápmái. Guokte minuhta ovdal go čiekčan nogai de oaččui Alaska moala ja de šattai loahppaboađusin 4-2 Sápmái.

– Mii berret vuoitit
Sámi nieiddaid boahtte čiekčan lea Team Nunavut vuostá ja dat lea duorastaga.
 – Mii berret dan vuoitit go mii diehtit ahte Nunavut vuoittáhalai Team Northwestii 7-4. Min joavku han časkkii Team Northwest 4-0, muitala Ann Kristine Balto, gii lea Sámi joavkojođiheaddji. 
 – Spábba han lea jorbbas ja mii fertet čiekčat álggos. Jus Sápmi vuoitá iežas ossodaga, de galget beallefinálas čiekčat dan heajumus joavkku vuostá. Nu mo dál lea, de leat Team Alaska ja Team Nunavut heajumusat dan ossodagas. Beallefinálat leat bearjadaga ja loahppavuorru fas lávvordaga, muitala Balto.

Lasit: del.icio.us | Digg