– Boazodoallu goaivu iežas hávddi!

Dan oaivvilda Finnmárkku boanddaid ja smávvadálolaččaid searvvi jođiheaddji, Gunnar Johnsen, go 14 A geassesiida guođoha dálvet lobihemiid iežaset ja Leavnnja boanddaid oktasaš geasseorohagas, Porsáŋggus.

– Nu go eará badjeolbmuin, de ii leat 14 A badjeolbmuinge dahkamuš dálvit geasseorohagas, cealká suhtus Johnsen, gii sihke ieš persovnnalaččat ja jođiheaddjin Finnmárkku boanddaid ja smávvadálolaččaid searvvis, lea dolkan 14 A geassesiidda, Spiertagáissá, lobihis guođohemiide mat čađahuvvojit dálvit sin oktasaš geasseorohagas.
 – Dát lea dakkár ášši mii bilida olles boazoealáhusa gova, iige čuoza dušše 14 A geassesiidii, oaivvilda son.

Ii šat soaittáhat
– Nu go mii boanddat vuohttit, geain lea oktasaš geasseorohat 14 A geassesiiddain, de ii leat dán siiddas šat sáhka soaittáhaga birra, muhto orru baicce dáhpin sis šaddan guođohit dálvebohccuid geasseorohagas, dadjá Johnsen, geas iežas eatnamiin maiddái leat leamašan bohccot guossis.
 – Dieđán ieš hui bures ahte dát ii leat vuosttaš háve go dát siida ii nagot ealu čohkket lulás, go min gittiin guhtot bohccot sihke dálvit ja geassit, muitala son.

Boazodoallu ii mieđit
14 A geassesiidda ovdaolmmoš, Kjell Magne Eira, ii mieđit Johnsena čuoččuhusaide.
 – Ahte dát lea dáhpin mis šaddan, lea áibbas badjel bávttiid. Leat bárttit nu go ritni vuomit, dálkkit ja ealu bieđganeapmi, mii lea sivvan dasa go min geasseorohagas ain leat bohccot, vástida Eira, ja muitala ahte sii leat maŋimuš mánu bargan sihke skohteriiguin ja helikopteriin, oččodan dihte bohccuid eret geasseorohagas. Dađi bahábut eai leat lihkostuvvan.
 – Lea váttis leamašan čohkket ealu, ja geasseorohagas lea ain olu boazu. In duostta dadjat juste man olu, go mii eat oba dieđege dan, muhto dás lea sáhka buori gárdemađi birra, ja badjel 1000 bohcco, muitala Eira. Mii galgá dahkkot dáinna osiin ealus, ii leat vel čielggas.
 – Go vuos leat ožžon ealu čoahkkái, de áigut árvvoštallat lea go šat veara johtit dálveorohahkii, dadjá son.

Hejot guođohuvvon
Gunnar Johnsen árvvoštallá ieš man dihte 14 A geasseorohagas ain leat bohccot.
 – In čiegat ahte mun oainnán dán áššis máŋga beali. Vuosttažettiin lea 14 A stuorra álbmot mas leat beare olu bohccot. Nubbi sivva lea ahte stuorra álbmoteallu lea beare hejot guođohuvvon, dadjá Johnsen. Kjell Magne Eira atná dáid jurdagiid ja cealkámušaid hui unohassan, iige hálit kommenteret dán.
 – Lea hui unohas go olmmoš, gii ii dovdda min beaivválaš bargguid doarvái bures, buktá dákkár cealkámušaid. Dat ii oro mu mielas heivvolaš, ja dan dihte in hálit vástidit dađi eanet diesa, dadjá son.
14 A geassesiiddas lea mearriduvvon boazolohku 6300, ja diimmá giđđa lohku čájehii ahte doppe ledje 8827 bohcco.

Eallit gillájit
Gunnar Johnsen mielas lea vahát go 14A siiddas ain lea oassi ealus geasseorohagas.
 – Ii dát dušše bilit bohccuid ovddas, muhto maiddái sávzzaid, main ii leat šat varas guohtun, go luitojuvvojit geasseorohahkii, ja dat ii leat dohkálaš. Ii leat váttis árvidit mo manná elliiguin go ii leat šat ealát, de lea dušše jearaldat áiggis, ovdal go čuohcagoahtá elliid álššaide ja dearvvašvuhtii, dadjá son.

Ádde boanddaid
Kjell Magne Eira ádde ahte dát dilálašvuohta lea suhttadan boanddaid, ja duođašta ahte sin siiddas leat guovtti maŋimuš jagis leamašan bárttit, mat leat daguhan váttisin oažžut bohccuid eret geasseorohagas.
 – Lea áddemis go boanddat leat suhttan go dát čuohcá sin elliid guohtumiid. Dát ii leat oktiige vuoitun, ii boazodollui iige boanddaide. Dát lea njulgestaga stuorra vahát midjiide buohkaide. Eat masse dušše guohtumiid, muhto maiddái čuohcá dát min ekonomalaš dillái, go eat leat beassan njuovahahkii vuovdit eará go 500 bohcco, ja go lea gártán midjiide stuorra gollun fievrruid doalahit, muitala Eira. Eira čilge ahte dušše helikoptera láigu lea sidjiide máksán badjel 300.000.
 – Dá lea dilli masa ii oktage áibbaš, muhto masa mii dađi bahábut leat gártan, dadjá son.

Láhka mearrida
Johnsen atná imašin go badjeolbmot 14 A geassesiiddas eai čuovo iežaset njuolggadusaid.
 – Mu mielas lea hui ártet go 14 A geassesiida jagiid badjel vállje badjelgeahččat boazodoallonjuolggadusaid ja lága. Ii leat heivvolaš dohppet lága iežas gieđaid gaskii, jus vel dása ii leat ovttaoaivilis. Nu go mu dieđu mielde lea, de ii leat 14 A goassige ohcan lobi mange siva geažil siiddastallat dálvit geasseorohagas. Lea maiddái hui hirpmástuhtti go Boazopolitiija ja Boazodoallohálddahus eai atte makkárge váikkuhusaid dán siidii, loahpaha Johnsen, gean mielas lea hui suddu go dákkár áššit bilidit gulahallama eanandoallo- ja boazodoalloealáhusa gaskka.

Lasit: del.icio.us | Digg