– Roassu heaittihit Infonuora

Sámi nuoraid diehtojuohkinorgána Infonuora áitet heaittihit. – Lea roassu jus sámi nuorat masset diehtojuohkima, lohká Infonuora redaktevra, Inger Persson.

Persson lohká ahte jus Infonuorra heaittihuvvo, de eai oaččo sámenuorat dan dieđu masa sis lea vuoigatvuohta.
 – Sámenuorain lea seamma riekti oažžut diehtojuohkima go eará nuorain, ja Infonuorra lea áidna diehtojuohkinčoavddus mii gávdno sámi nuoraide. Jus dat heaittihuvvo, de eai oaččo sámenuorat dieđuid maid galget oažžut, muitala vuorjašuvvan Persson.  

Sámediggi ja stáhta ii ruhtat
Son muitala ahte lea váttis gávdnat ruhtadeami diehtojuohkinorgánii. Mannan jagi ii ruhtadan Sámediggi Infonuora.
 – 2009:s eat ožžon doarjaga Sámedikkis. Dasa lassin lea stáhta maid geassán doarjaga, muitala Persson.
 Ii leat vuos mearriduvvon geat galget ruhtadit Infonuora, ja dattetge ii leat vuos mearriduvvon joatkašuvvá go neahttasiidu. Dál lea Nordlándda fylkkagielda mii eaiggáduššá Infonuora, ja Finnmárkku ja Romssa fylkkagielda leamaš mielde doarjumis neahttasiiddu.

Unnán sámediehtu
Maŋimuš áiggi leamaš Ávviris ja medias muđuid digaštallon man unnán diehtu Norgga nuorain ja álbmogis lea sápmelaččaid birra. Dattetge imaštallá Persson manne Infonuorra sáhttá heaittihuvvot, go lea baicce eambo diehtu, ii ge unnit diehtu sápmelaččaid birra mii dárbbašuvvo.
 – Dál lea digaštallan dan birra ahte Norgga álbmot diehtá menddo unnán sápmelaččaid birra, ja de ii oro heivvolaš heaittihit Infonuora mii maiddái doaibmá de go diehtojuohkin sápmelaččaid birra, lohká son.

Ohppui ávkin
Olu skuvllat geavahit Infonuora siiddu oahppan dihtii mo sápmelaččat ellet. Perssona mielas galggašii Infonuorra ovdánahttot dan sadjái go heaittihuvvot.
 – Infonuorra berrešii oažžut vejolašvuođa ođasmahttit ja ovdánahttit, deattuha Infonuora redaktevra, Inger Persson.

Buohkat čoahkkimiin
Infonuorra juohká dieđuid njealji gillii, davvisámegillii, julevsámegillii, oarjelsámegillii ja dárogillii. Unnán resurssaid dihtii lea dál dušše okta bargi Infonuoras, journalistavirggit mat ovdal ledje, leat heaittihuvvon.
 Nordlándda fylkkagieldda ráđđi čoahkkinasttii olles maŋŋebárgga, eaige sáhttán vástidit áššái ikte. Sámedikkis maid ii lean oktage gii maŋŋebárgga sáhtii kommenteret ášši. Ođasmahttin-, hálddahus- ja girkodepartemeanttas lea ovddasvástádus sámeáššiin, Ávvir ii ožžon doppe vástádusa ovdal go aviisa manai deaddileapmái.

Lasit: del.icio.us | Digg