BEAHTAHALLAN iežas bellodahkii

Ovddeš Finnmárkku AUF jođiheaddji ja sápmelaš Johan Vasara lea duhtameahttun go Stuorradikki bellodatustibat eai vuorut sámeealáhusa ovdáneami.

Ealáhus- ja gávpeministara Trond Giske dat lea válljen Norgga ráđđehusa ovddas olbmuid bargojovkui mas leat mielde nuorra ealáhusjođiheaddjit geain lea iešguđet lágan duogáš, ja sii ovddastit buot guovlluid Norggas.  
 Sii galget evttohit mot ovdánahttit ealáhusaid Norggas, muhto Johan Vasara reágere go oaidná namaid geaid  bellodatustit Giske lea nammadan dohko.
 – Nu mo mun oainnán dán listtus, de ii leat oktage Finnmárkkus mielde das, ja guhkkin eret okte ge sápmelaš, lohká behtohallan Vasara ja čujuha listui gos dat 20 válljejuvvon bargojoavkku áirasat leat.
 – Menddo dávjá go "olles" riika namahuvvo, de ii leat Davvi-Norga mielde dan namahusas, lasiha son.

Stuorradiggedieđáhus
– Erenomážit go sihke ruvdnoprinsa Haakon Magnus ja Trond Giske leaba mielde joavkkus, de galggašii vuordit ahte olles Norga ovddastuvvo das. Nu maiddái sápmelaččat, dadjá son.
 Vasara, gii lea Sámedikki nuoraidpolitihkalaš lávdegotti (SNPL) jođiheaddji, oaivvilda ahte go sápmelaččat eai leat ovddastuvvon bargojoavkkus, de rihkku dat Stuorradiggedieđáhus nummár 28 (2007-2008). Stuorradiggedieđáhusas deattuhuvvo ahte ealáhusdoaimmat sámeguovlluin fertejit nannejuvvot.
 – Dattetge orru ráđđehus vuot ain vajáldahttimin davviguovlluid. Ii sáhte šaddat nu ahte Stuorradiggedieđáhusat dušše leat sánit ildus mat čogget gavjja, lohká SNPL jođiheaddji.

Čállit reivve
SNPL áigu čállit reivve mas čujuhit sihke davviguovlluvuoruheapmái ja Stuorradiggedieđáhus nummar 28.
 – SNPL ferte dása reageret. Mii boahtit sáddet reivve ministtar Giskei, ja vuordit maid ahte dat váldo vuhtii, dadjá Vasara, gii lea máŋgii deaivan Giske su AUF ámmáha bokte.

Áirasat
SNPL jođiheaddjis eai leat konkrehta ovdamearkkat gean son evttohivččii bargojovkui.
 – Dan ii leat SNPL geahčadan. Muhto sihke bohccobierggu márkanastimis ja mátkeealáhusas berrejit leat áigeguovdilis áirasat, oaivvilda Johan Vasara.
 
Ealáhus - ja gávpedepartemeanttas eai vástidan áššái maide ovdal aviisa manai deaddileapmái.

Lasit: del.icio.us | Digg