Norggameašttir ja beakkálmas

Kárášjoga gánda Nils Kai Ante Anti (16) vuittii Rákko Čuoivvat herggiin Norggameašttirgilvvuid Romssas sotnabeaivvi. Maŋŋá čuoččui olles čora journalisttat su birra.

Rákko čuoivvat ja heargevuoddji Nils Kai Ánte, Kárášjoga Gilvo Hearggit, vuittiiga moallagovas. Muhtimin lea duháhatoasit sekunddas mat earuhit vuoiti ja vuoittáhallama. Nils Kai Ánte beasai duođaid vásihit beakkálmasvuođa maŋŋá go vuoittut ledje juhkkojuvvon.
 – Lea hui somá go lea nu stuorra beroštupmi, lohká son ja mojohallá.
Englándda TransWorld Sport tv-joavku lea aiddo filbmen ja jearahallan Nils Kai Ánte, journalisttat ja govvideaddjit iešguđet aviissain leat čoahkkanan su birra, ja mánát leat jearahan su vuolláičállaga.

Seamma heargi vuittii fas
– Lei maiddái áibbas somá vuoitit, muitala duhtavaš nuorra meašttir.
Son vuittii 2008:s junior NM heargevuodjimis, dalle seamma herggiin, ja diibmá maid vuittii Rákko čuoivvat Senior NM, muhto dalle eará vuddjiin.
 – Lea erenomáš buorre dovdu go vuodjá gilvoherggiin, mun oaččun albma "kicka", muitala Nils Kai Ánte.  Son lea gilvalan heargevuodjimis badjel njeallje jagi juo.

Buorre čalbmi
Heargeeaiggát Máret Ingá Eira ii lean ieš Romssas dán vahkkoloahpa, muhto Nils Kai Ánte vujii maiddái Máret Ingá Eira vielja hearggi, S-Ruškkut. Dainna šattai Nils Kai Ánte goalmmádin. Ánde Niillas Eira eaiggáduššá S-Ruškkuha, ja son muitala ahte sudno Máret Iŋggá áhčči, Klemet Amund Eira, gii lágida gilvvuid SVL-N ovddas, lea erenomáš čeahppi gávdnat vales herggiid.
 – Dus ferte čalbmi heargái jus galgá gávdnat jođánis hearggi. Áhčči láve misiin jo oaidnit guhte sáhttá šaddat buorre gilvoheargin. Dalle doallá čatnat 4-5 miesi maid mii hárjehit gilvoheargin, muitala Ánde Niillas.
Ánde Niillas lea ieš ovdal gilvvohallan, muhto lea dál menddo lossat. Sii lávejit hárjehallat herggiin birra jagi Kárášjogas.
 – Buoremus lea deaddit sullii 63 kilo jus áigu herggiin vuodjit. Nils Kai Ante deaddá 60,6 kilo ja heive erenomáš bures gilvovuoddjin, muitala Ánde Niillas.
Nils Kai Ánttes fertejedje mielde guokte čáhceboahtala go vujii, vai šaddá áibbas riekta deaddu.

Junior
Juniorluohkás maid lágiduvvoje gilvvut, muhto dat eai lean Norggameašttirgilvvut. Junior joavkku vuittii Mats Áilu Eira (11) Guovdageainnu GS ovddas. Son vujii iežas hearggi, XM.
 – Hui somá gilvvohallat ja dasa lassin vuoitit!, celkkii son.

Duhtavaš
Midnight Sun Marathon (MSM) beaivválaš jođiheaddji ja Romssa Sámi vahkku lágideaddji Nils I. Hætta lea hui duhtavaš dán jagáš lágidemiin.
 – Eai leat leamaš makkárge váttisvuođat, dán jagi ii gahččan oktage herggiin, mojohallá son.
MSM osttii muohttaga gilvvuide, muhto dan ii livčče dárbu, go vahkkoloahpas bođii muohta eambo go doarvái.

Olu olmmoš
Birrasiid 2000 olbmo ledje čoahkkanan geahččat NM heargevuodjimiid, ja dat lea eambo go diibmá. Vaikko lei olu olmmoš ja gelddolaš gilvvut, de váillui huikkas ja jietna gehččiin, muhto "speaker" lei čeahppi.

Lasit: del.icio.us | Digg