– Árbevierus buorre elliidsuodjaleapmi

Borramušbearráigeahču jurista André Stener Kalstad lea guorahallan elliidčálgolága ja sámi árbevieruid boazodoalus. – Árbevierus ja lágas leat sullii seamma eavttut elliid várjaleamis, muitalii son boazodoallosemináras Romssa universitehtas.

Boazodoalloseminára lágiduvvui Romssas duorastaga ja bearjadaga. Seminára geahčada juridihkalaččat sámi árbevirolaš njuolggadusaid boazodoalus ja Norgga boazodoallolágaid, ja man láhkai dat rihkku nubbi nuppi. Stener Kalstad bargá Borramušbearráigeahčus ja logaldalai goas boazu lea menddo čoalehuhtton.
 – Sihke lágas ja árbevierus lea nu ahte mađi friddjaset boazu lea, dađi unnit lea olbmo ovddasvástádus biebmat dan, lohká Stener Kalstad. Son lea iešalddis gávnnahan dan go lea guorahallan elliidčálgolága ja raportta, "Elliid čálgu sámi kultuvrras" maid Ole Henrik Magga, Nils Oskal ja Mikkel Nils Sara leat čállán.

Dárbbašlaš noađđi
Elliidčálgolágas čuožžu ahte elliid galgá dikšut bures ja várjalit daid dárbbatmeahttun noađis, muhto lágas leat kommentárat mat čilgejit mii lea dárbbašlaš noađđi. Boazodoalus gos bohccot leat guohtumis birra jagi, de leat olu noađit masa bohccot šaddat, nu mo ruoidnan dálvit, dakkár mainna boazoeaiggát ii sáhte dahkat maidige.
 – Láhkaaddi lea dohkkehan ahte bohcco deaddu rievdá áigodagaid mielde. Buoidi čakčat, ja ruoidná dálvit, muhto lága ulbmil lea ahte boazu galgá ruoidnat nu unnán go vejolaš, lohká Stener Kalstad.

Boazu galgá birget olbmo haga
"Elliid čálgu sámi kultuvrras" raporttas maid Ole Henrik Magga, Nils Oskal ja Mikkel Nils Sara leat čállán boahtá fas ovdan ahte boazu lea friddja ealli sámiid oainnus. Go lea hui heajos guohtun, de luoitá boazodoalli bohcco ieš gávdnat guohtuma. Boazu lea lunddolaččat čeahpit go olmmoš gávdnat guohtuma. Raporttas daddjo ahte bohccui lea buoremus gullat luhtui, ii ge borahit dan.
 – Raporttas daddjo ahte árbevirolaččat ii leamaš ehtalaš riekta biebmat bohcco, go dalle boazu ii birge olbmo haga, muitala Stener Kalstad.

Guhká bargan
– Go dáid lean geahčadan, de orru mu mielas nu ahte sihke lágas ja árbevierus ferte geahčadit dárbbu borahit bohcco. Ahte ii sáhte lága bokte bágget boazodoalli borahit bohcco, go heajos goahtun lea lága mielde dárbbašlaš noađđi, ja árbevieru raportta mielde fas lea boastut borahit bohcco beare haga, čilge Stener Kalstad.
André Stener Kalstad lea guhká bargan lágain Sámis ja boazodoalus. Son lea earret eará leamaš mielde "riekti eatnamiidda ja čáziide" barggus. Son lea maid bargan fárrolága advokáhtain John Jonasseniin, ja soai leaba čállán man láhkai boazodoalu siiddat sáhttet sulastahttot siskkildas fitnodagaiguin.
 – Dát bargu leamaš dehálaš vuoi Norgga eiseválddit áddejit man láhkai boazodoalu sáhttá ipmirdit lágaid ektui, muitala Stener Kalstad.
Dál son bargá Borramušbearráigeahču seniorráđđeaddin Guovdageainnus.

Lasit: del.icio.us | Digg