– In šatta ávvudit Sámi álbmotbeaivvi

Guovdageainnu Ovddádusbellodagas (Ob) jođiheaddji, Svein Ole Sandvik, ii šatta odne ávvudit Sámi álbmotbeaivvi go sis lea jahkečoahkkin Norgga stuorámus sámi suohkanis.

Finnmárkku Ovddádusbellodaga fylkkačoahkkin lea Guovdageainnu Thon hoteallas dán vahkkoloahpa. Dohko bohtet 39 delegáhta, olles fylkkas, ja sáttatolbmot ja guossit.
 Jahkečoahkkimis meannudit dábálaš jahkečoahkkináššiid ja leat maid digaštallamat, dasa lassin galget válljet prográmma ja nammadanlávdegotti.  
 – In astta gal Sámi álbmotbeaivvi ávvudit. lohká Svein Ole Sandvik, gii lea Guovdageainnu Ovddádusbellodaga jođiheaddji. Son čájeha áššelisttu mas leat ollu áššit.  
 – Mu mielas leat baicca áššit dehálaččat, lohká Svein Ole Sandvik.

Ii unohas
Sandvik ii jáhke gal dasa ahte Finnmárkku Ovddádusbellodat lea mieleavttus bidjan jahkečoahkkima Sámi álbmotbeaivái.
 – In dan gal doaivvo, jáhkán baicca ahte heivii dan dáhtona nala, čilge Sandvik. Son čilge ahte sis leat olu delegáhtat geat bohtet ja lea diibmá juo mearriduvvon dat dáhton.
 Svein Ole Sandvik lohká alcces gal ii daga maidege go lea jahkečoahkkin Sámi álbmotbeaivvi.
 – In mun gal dan ane unohassan in moktege, lohká son. Son lohká ahte muhtumin šaddá olmmoš dan maid vásihit ahte ii beasa dahje šatta ávvudit Sámi álbmotbeaivvi.

Sátnejođiheaddji rahpamis
Sandvik diehtá muitalit ahte Guovdageainnu sátnejođiheaddji Klemet Erland Hætta boahtá rahpat sin jahkečoahkkima Sámi álbmotbeaivvi. Son ii loga dađi eambbo diehtit das eará ahte son rahpá čoahkkima.
  – Sáhtán dušše árvaladdat ahte son boahtá namuhit ahte lea Sámi álbmotbeaivi, árvaladdá Sandvik. Ávvir ii ožžon ságaide sátnejođiheaddji Klemet Erland Hætta.

Láven ávvudit
Sandvik lohká gal iežas ávvudan beaivvi nu guhká go lea leamaš.
 – Lea dušše moddii dáhpáhuvvan ahte in leat ávvudan, lohká Svein Ole Sandvik, gean mielas lea Sámi álbmotbeaivi dehálaš sámiide.
 – Sámi álbmotbeaivvi gal doaivvun bissut agibeaivvi, ja ii leat nu váralaš jus dán jagi in šatta ávvudit dan. Ferten dan maid vásihit ahte in ávvut Sámi álbmotbeaivvi, oaivvilda son.

Beaivvis lea árvu
Ovddádusbellodagas lea guhkit áigge leamaš sáhka sihke Sámedikki ja Fylkkadikki heaittihit. Sandvik muitala ahte das ii leat makkárge dramatihkka.
 – Lea bellodaga oaidnu ahte eat dárbbaš eará go stáhta ja suohkaniid, čilge son. Son muitala maid ahte son ii jáhke gal Sámedikki goassege heaittihuvvot.
   – Jus min bellodat Stuoradikkis goassege vuoitá, na de jáhkán dušše šaddat eará organiserema Sámedikkis, muhto ii dat gal heaittihuvvo, lohká son.  

Lasit: del.icio.us | Digg