Eai beasa áiddi cegget

Luondduhálddašandirektoráhtta hilgu Nordlándda Fylkkamánni mearrádusa cegget áiddi mii galgá hehttet bohccuid vuddjomis togaide Sáltoduoddaris ja sihtet Fylkkamánni ođđasit guorahallat togaáiddi váikkuhusaid.

– Mii leat hirbmat duhtavaččat, muhto seammás vurddiimet ahte Luondduhálddašandirektoráhtta hilgu Nordlándda Fylkkamánni mearrádusa, dadjá Norgga Luonddugáhttensearvvi Nordlándda ossodaga jođiheaddji Erling Solvang. Luondduhálddašandirektoráhtta meannudii ođđajagemánu 26. beaivvi dán jagi ahte ášši hilgojuvvo ja ahte šaddet ođđasit guorahallat dakkár áiddi váikkuhusaid, danin go guorahallan ii lean doarvái buorre.
 Leige Norgga Luonddugáhttensearvvi ja Norgga Ornitologalaš Searvvi Nordlándda ossodagat mat váide Nordlándda fylkkamánni mearrádusa suovvat cegget njeallje kilomehtera guhkkosaš áiddi Semska ja Sørelva gaskkas Sáltoduoddaris. Lei Jernbaneverket mii lei ohcan beassat cegget áiddi dán guvlui ja Fylkkamánni meannudii ohcama golggotmánu 30. beaivvi 2009 ja suvve cegget bealnjealját mehtera alla áiddi dán guvlui, mii lea Sáltoduoddara luonddusuodjalanguovllus. Sii ledje čállán mearrádusas ahte jus áidu dušše dagaha ahte váttisvuohta sirdašuvvo eará guovlluide, de galgá áidi gaikojuvvot. Ášši galggai árvvoštallojuvvot viđa jagi geahčen.

– Hejot guorahallan ášši
Luonddugáhttensearvi ja Ornitologalaš searvi čujuhedje dasa ahte ii leat doarvái guorahallojuvvon makkár váikkuhusat dán áiddis leat lundui, elliide ja lottiide, ja sii čujuhit ge dasa ahte fylkkamánni mieđihii ahte ášši lei beare hejot guorahallojuvvon.
 – Dát ášši lei nu hejot guorahallojuvvon ahte mearrádus ii sáhttán šaddat earaládje Luondduhálddašandirektoráhta bealis, dadjá Solvang. Son deattuha ahte dá lea hui váttis ášši ja ahte sii sávvet ahte boahtá albma čoavddus mii hehtte ná ollu bohccuid vuddjot togaide.
 
Vuordámušat čoahkkimii
Ikte leige Nordlándda Fylkkamánni bovden buot beliid maidda dát ášši guoská čoahkkimii ja Luonddugáhttensearvvi jođiheaddjis leatge stuora vuordámušat dán čoahkkimii.
 – Dá lea hui váttis ášši, muhto mii sávvat ahte dása gávdnet buori čovdosa, danin go dál han gávdno nu ollu ja buorre teknologiija maid sáhttet atnit hehtten dihte bohccuid gillámis go vuddjojit togaide, dadjá Solvang ja čujuha ge kárttaide mat čájehit gos bohccot vuddjojit togaide.
 

Lasit: del.icio.us | Digg