– Dáhpedorpmis dáhpáhuvvan

Finnmárkku Journalistasearvi lea válljen doallat čoahkkima aiddo dán vahkkoloahpa goas Sámi álbmotbeaivvi ávvudoalut leat miehtá Sámi. Sámi journalisttat atnet dán oalle unohassan.

– Lea hui šállošahtti go eanaš sámi journalisttain ii leat vejolaš searvat dan čoahkkimii dán vahkkoloahpa, ja dáhkidan ahte diet ii galgga šat dáhpáhuvvat nu guhká go mun lean Finnmárkku Journalistasearvvi jođiheaddji, lohká Dan Robert Larsen.

Buoremus čoahkkin
Čoahkkimis galget digaštallat, mo "roggat" áššiid ja olu dehálaš fágalaš áššit journalisttaid várás. Čoahkkin galgá leat dat buoremus mii leamaš dán rádjái, Larsena dieđuid mielde.  Doppe galget maid logaldallit; earret eará Eni Norge, Finnmárkku vuosttaš oljoprošeavtta birra, FeFo, Dalane Tidende váldodoaimmaheaddji Kjetil Stormark ja earret eará fylkkagieldda diehtojuohkki Trond Magne Henriksen muitalit journalistastipeandda birra.

Dáhpedorpmis
Larsen čilge Ávvirii ahte dalle go dát čoahkkin plánejuvvui, lei son olu jođus bargomátkkiin, iige fuomášan ovdal go juovlamánus dán čoahkkindáhtona.
 – Fuomášin easkka juovlamánus ahte čoahkkin lei biddjon aiddo Sámi álbmotbeaivvi vahkkolohppii, muhto dalle lei juo maŋŋit rievdadit áiggi mii lei dáhpedorpmis válljejuvvon. Rievdadeapmi ii lean šat vejolaš go eanas plánen ja lihtodeamit logaldalliiguin ledje dahkkon, šálloša son.

Unohas
Sámi Journalistasearvvi stivramiellahttu Liv Inger Somby lohká iežaset čállaga bokte moaitán Finnmárkku Journalistasearvái áigodaga válljema.
 – Mis leamaš dát áššin stivrračoahkkimis, ja válljiimet čálalaččat moaitit go justa Sámi álbmotbeaivái leat dákkár čoahkkima bidjan, ja atnit njulgestaga unohassan dan. Dás leat máŋga beali, sihke dat ahte olugat sámi journalisttain leat barggus ávvudoaluid oktavuođas, ja nubbi lea priváhtta bealli, ahte olbmot han háliidit bearrašiin ávvudit fárrolaga, čilge Somby.
NRKJ  fágasearvvi jođiheaddji Mathis Eira ii maid leat liikon dása.
 – Dát lea unohas ja váidalahtti go muhtin sámi journalisttat eai beasa searvat čoahkkimii, dadjá oanehaččat Ávvirii.

Badjelgeahččanvuohta?
Sámi stuorámus aviissa Ságat váldodoaimmaheaddji Geir Wulff lohká organisašuvnnat ieža válljejit goas čoahkkimiid dollet, muhto liikká imašta go čoahkkima leat vuoruhan doallat juste dán beaivvi.
 – Mun in dieđe man olus Ságat journalisttain leat oasálastimin dien čoahkkimii, muhto jáhkán eatnašat vuoruhit redakšuvnnalaš bargguid boahtte vahkkoloahpa.
Dattetge lea Finnmárkku Journalistasearvvi mearrádus nu, ja imaštan go orru dego badjelgeahččanvuohta dát, lohká son.

Čurbbet dahkkon
Ávvira váldodoaimmaheaddji Sara Beate Eira mielas orru dát čurbbet dahkkon.
 – Mu mielas gal leat oba čuorbbit leamaš válljet beaivvi goas dákkár dehálaš digaštallama lágidit. Árvideames leat sámi mediain eanas journalisttat bargame Sámi álbmotbeaivvi ja eai sáhte searvat čoahkkimii. Ávviris goit leat measta buot journalisttat barggus lávvordaga ja sis goit ii leat vejolašvuohta vuolgit Hámmárfesttii.

Ii mieleavttus
Eira ii gal jáhke dát lea mieleavttus dahkkon.
 – Vaikko imaštalan dán válljema, de in gal jáhke Finnmárkku Journalistasearvvi mieleavttus dahkan ná olgguštan dihte sámi journalisttaid. Ávžžuhan goitge journalistasearvvi dárkileappot jurdilit boahtte háve go dákkár čoahkkima galget lágidit, vuoi buot miellahtuin lea vejolašvuohta searvat, lohká son.

Dáhkida
Finnmárkku Journalistasearvvi jođiheaddji Dan Robert Larsen dáhkida váldit maid vuhtii sámi miellahtuid boahtteáiggis.
 – Čavččabeallái galgá jahkečoahkkin dollot searvvis ja dalle geahččalat heivehit dakkár vahkkolohppii mii vuohkkaseappot heivešii eatnašiidda, loahpaha son.

Lasit: del.icio.us | Digg