Sámi jietna nissonlávdegottis

Ragnhild Dalheim Eriksen ovddasta sámiid ođđa nissonlávdegottis, mii galgá čuvget ráđđehussii ođđa beliid dásseárvobarggus ja hábmemis boahttevaš dásseárvopolitihka Norggas

– Mun oainnán dán barggu dehálažžan, ja lean vuolgán sámi jietnan stuorra vuollegašvuođain ja gutniin, lohká Ragnhild Dalheim Eriksen, gii lea eret Omasvuonas, Romssa suohkanis ja lea Riddu Riđu jođiheaddji. Son lohká dán barggu leat stuorra hástalussan ja addá maid sutnje erenomáš stuorra ovddasvástádusa.
 – Lean sihke suorganan ja maid seammás veháš čeavlái, dadjá son.

Ulbmil
Nissonlávdegoddi maid Mánáid-, Dásseárvo- ja Ovttadahttinministtar Audun Lysbakken almmuhii, galgá ealáskahttit dásseárvodigaštallama, ja čuvget ođđa beliid iešguđetge nissonbirrasiin, maiguin dábálaččat eai deaivvat. Nissonlávdegoddi galgá maid čuvget hástalusaid ja addit ođđa fámuid dásseárvodigaštallamii. Ministara jurdda lea ávkkástallat dieđuid maid nissonlávdegottis ožžot ja almmáirollalávdegotti cealkámušaid bokte hábmet boahttevaš dásseárvopolitihka.

Dehálaš áššit
Nissonlávdegottis leat buotlágan servodagain čoagganan olbmot, sihke girječállit, journalisttat, jođiheaddjit, penšunisttat, oahpaheaddjit, elektrihkar, ja olu njunuš virggiin olles Norggas. Ragnhild Dalheim Eriksen lohká leat vuos árrat dadjat makkár mihttomearit sus leat dán barggus, muhto son áigu čatnat oktavuođaid dehálaš resursaolbmuiguin, sihke nissoniiguin ja albmáiguin dán barggu oktavuođas, ja ávkkástallat daid vásáhusaid maidda sin bokte dovddiida.
 – Mun háliidan oktavuođaid buotlágan ealáhusaid olbmuiguin Sámis, ja oahpásmuvvat sin vásáhusaide ja hástalusaide.  Oainnán maid dehálažžan čuvget sámiid dili maid ieš dovddan mearrasápmelažžan, ja maid daid hástalusaid mat sámi nissoniin leat muđui, sihke dásseárvooktavuođas gaskal nissoniid ja albmáid, rievttit, bálkkát ja nissonvealaheamit, čilge son.
 
Sámit ovdamearkan
– Dábálaččat leat sámi nissonat hui gievrrat ja sin posišuvnnat sáhttet leat ovdamearkan maid eará nissonjoavkkuide dán barggu oktavuođas, oaivvilda Dalheim Eriksen.
Ii son liikká oaivvil ahte sámenissoniin eai leat maid rahčamušat ja hástalusat, muhto go buohtastahttá sisafárrejeaddji nissoniid diliin, de gal oaidná man buorre dilli sámenissoniin lea.
 – Áidna maid sáhttá buohtastahttit lea ahte sámenissonat ja sisafárrejeaddji nissonat leat unnitlogus, dadjá son.

Riddu Riđđu ovdamearkan
Dalheim Eriksen maid oaivvilda Riddu Riđu barggu leat buorren ovdamearkan mo buoridit dili ja iešdovddu loktet olbmuin.
 – Riddu Riđđu lea borre ovdamearka mo festiválain leat nagodan loktet mearrasámiid iešdovddu ja čeavláivuođa leat sápmelažžan, oaivvilda Dalheim Eriksen.
Nubbi maid son háliida deattuhit lea ahte Riddu Riđus leat eanaš nissonjođiheaddjit leamašan ja dat iešalddis čájeha ahte Sámis leat olu čeahpes nissonat geat nagodit jođihit diekkár bargguid. Son ferte gal vel namuhastit ahte sis gal leat maid máilmmi čeahpes albmát stivrras mielde, ja olu rápmi sidjiide maid.

Bargu ovddos guvlui
Ragnhild Dalheim Eriksen lohká boahtte čoahkkima njukčamánu vuosttas beaivvi Oslos, ja dalle galget sii juo bohtosiid oaidnigoahtit.
 – Mun jáhkán proseassas bohtet ovdan olu garra muitalusat ja vásáhusat, ja orron jo lávdegotti almmuheami oktavuođas vuohttán čielga áššiid departementii, lohká son. Loahpas vel čilge manne su jáhkká válljen lávdegoddái.
  –  Mun jahkán mun válljejuvvojin Riddu Riđu barggu geažil, mas leamaš hui olu dahkamuš eamiálbmogiin, ja go lean áŋgiruššan dan barggus, loahpaha son.

Lasit: del.icio.us | Digg