Sámi gánda máilmmemeašttirin

Golli ja bronsamedáljjat bohte mannan vahkkoloahpa Duiskkas Sápmái. Finn Hågen Krogh dagai juoga maid ii oktage sámi dahje finnmárkulaš junior čuoigi leat ovdal nagodan.

Finn Hågen Krogh, gii lea Fállejogas Álttás eret, šattai historjjálaš medáljavuoitin go mannan sotnabeaivvi faskii gollemedáljja junior máilmmemeašttirgilvvuin Hinterzarten nammasaš báikkis Duiskkas. Son vuittii maid bronsamedáljja bearjadaga, 20 km individuála čuoigamis. Krogh muitalasttii oanehaččat ikte mo son faskii golli dalle go šattai gilvu Norgga ja Ruošša gaskka.
 – Mun ledjen plánen Ruošša čuoigi maŋis čuoigat dassái go moalla lahkona, ja de bidjalit leavttu. Dat manai aiddo nu mo ledjen jurddašan, vaikko Ruošša vikkai mus báhtui čuoigat - de son ii liikká nagodan mu guođđit, čilge gollemeašttir. Son maid muitalii iežas diehtán ovdagihtii ahte dat Ruošša ii lean nu falli čuoigama loahpas.

Historjjálaš
Krogh šattai ge historjjálažžan, go lea vuosttaš sápmelaš ja finnmárkulaš gii faske medáljjaid junior máilmmemeašttirgilvvuin. Eai leat Kristin Størmer Steira, Vegard Ulvang, John Kristian Dahl dahje Krister Sørgård goassige vuoitán medáljjaid junior máilmmemeašttirgilvvuin, nu go Krogh.

Sámi ovdagovva
Finn Hågen Kroghii geigii Sámediggi jagi 2008 valáštallanstipeandda, oktan nuppi sámi nurrii, Odd Isak Kappfjellii, ja dalle sártnui sámediggepresideanta Egil Olli ná: – Soai leaba čalmmustan iežaska hui positiivvalaččat valáštallansurggiideaskka bokte, ja soai leaba nana ovdagovvan valáštallamii ja sámi nuoraide.
 – Duođaid oidno ahte lea ávki leamaš stipeanddas, ja leage somá go ná bures lea mannan nuorain gii lea ožžon valáštallanstipeandda Sámedikkis, lohká Bargiidbellodaga ráđđeaddi, Bjarne Store-Jakobsen Ávvirii.

Balto sogalaš
– Finn Hågen Krogh lea dološ beakkán Samuel Balto fuolki, gii čuoiggai Nanseniin Ruonáeatnama badjel, čilge kárášjohkalaš fuolki ja ovddeš SVL-jođiheaddji Petter Asbjørn Balto Ávvirii.
 – La hui somá go min sogas lea nie buorre čuoigi, ja orru vuhttomin ahte dološ genat ain vuhttojit, dadjá Balto. Son orru veháš liikon dasa, muhto ii loga gal iežas čevllohallat gal liikká dainna.

– Juoidá várra árben
Finn Hågen Krogh gal ieš ii loga diehtit ahte son lea Samuel Balto fuolki go Ávvir dan birra jearrala, muhto son gal oaivvilda maid ahte várra juoga lea son ge árben.
 Krogh lohká alddis dál ovddos guvlui ráhkkanit junior Norggameašttirgilvvut njukčamánus Strynas.
 – Norgga cup lea maid das maŋŋelis, mii gártá munnje hui dehálažžan, go áigumuš lea ain joatkit riikajoavkkus ovddos guvlui, loahpaha son.

Lasit: del.icio.us | Digg