Áhčči oinnii lihkoshisvuođa

Deanu nieida Marita Trosten Nilsen (18) lápmahuvai fasttiid skohtergilvvus Deanus mannan lávvordaga. – Lei issoras oaidnit mu nieidda roasmmohuvvamin fasttit, dadjá áhčči Åsmund Nilsen.

18 jahkásaš Deanu nieida, Marita Trosten Nilsen sáddejuvvui UNN buohccivissui Romsii, gos dál lea  čuohpaduvvon. Áhčči  Åsmund Nilsen mielas lei ilgat oaidnit nieiddas bártideame skohteriin.
 – Mun ledjen das lahka, ja oidnen dan suorggahahtti lihkohisvuođa. Ledje golbma skohtera buohtalaga go beaškkehedje oktii. Mu nieida jorihii birra das ja de bohte maŋis moadde skohtera mat vudje su badjel. Dalle gal ferten lohkat ahte mus manai galmmas čađa rupmaša, ja go vel oidnen dan ahte son ii nagodan lihkadit, de dieđusge jurdilin máŋga jurdaga, muitala Åsmund Nilsen.
 Dakka maŋŋel lihkohisvuođa sáddejuvvui Marita Trosten Nilsen UNN buohccivissui Romsii, ja doppe fuomáše ahte sus lei mollanan vuolimus čielgedákti.

Lea čuohpaduvvon
Mánnodatija čuohpade Marita Trosten Nilsena UNN buohcciviesus ja su váhnemat leigga maid boahtán Romsii.
 – Ean leat vuos beassan deaivvadit nieiddain, muhto moai letne ságastan doaktáriiguin. Sii leat muitalan ahte čuohpadeapmi lea mannan bures ja Marita nagoda lihkahallat julggiid. Dat lea goit buorre ja moai eamidiin sávve goit ahte dat manná bures, lohká Åsmund Nilsen.
 Váhnemiid mielas lea lossat go Marita lea easka álgán skohtergilvvuid vuodjit. – Go de šaddá dákkár lihkohisvuohta, de ii leat somás vásáhus, loahpaha Åsmund Nilsen.

Lei ollu rusta
Máze skohtervuoddji Johan Ivvár N. Gaup, gii vuittii Pro Open luohká ja nubbin bođii Pro Stock 600 luohká, muitala ahte Deanus lei buolaš ja rusta. Liikká ii hálit árvvoštallat ahte lei dálki sivvan lihkohisvuhtii.
 – Dákkár easkaálgi skohtervuoddjái ii dieđusge lean álki vuodjit rustta siste. Dat sáhttá maid dagahan ahte šattai na fasttes lihkohisvuohta, muhto dan lea váttis árvvoštallat maŋŋel, čilge Johan Ivvár Gaup.
 – Diibmá lei maid fasttes lihkohisvuohta nissonolbmuid luohkás. Lei muhtun gii doji juolggi, muđui olbmáid luohkás eai leat leamaš guhkes áigái dákkár lihkohisvuođat, loahpaha Johan Ivvár Gaup.

Lasit: del.icio.us | Digg