Sámegiella hilgojuvvon

Finnmárkku fylkkamánni neahttasiidduin gávnnat maid sámeleavgga mii muitala ahte dáppe leat čállosat sámegillii. Muhto go rabat daid, de dat leat guoros.

– Giellalága njuolggadusat geatnegahttet Fylkkamánni buktit fálaldaga, lohká Sámedikki várrepresideanta Marianne Balto vuosttas kommentáran.
 Finnmárkku Fylkkamánni almmuha ge iežas neahttasiidus dieđuid ja ođđasiid buot beliin sin hálddašeamis. Muhto  sámeleavgga vuolde lea áibbas ávdin máilbmái. Dát siiddut leat áibbas guoros, ja dat moadde dieđu dahje ođđasa leat dolin juo boarásmuvvan eaige šat leat áigeguovdilat mange láhkai.

Giellaláhka geatnegahttá
Sámedikki várrepresideanta Marianne Balto mielas lea dát gal oalle imaš dan sivas go Fylkkamánni han lea stáhta bealis orgána mii galgá čuovvut ahte earát čuvvot mearrádusaid ja njuolggadusaid mat servodahkii gusket.
 – Ferten gal vuos dadjat go juo leavga lea dies, dalle goit leamaš áigumuš sis sámegillii maid dieđihit, muhto manne dan eai leat ollášuhttán, dan in arvva dadjat. Dieđusge lea álbmogis vuordámušat ahte Fylkkamánni addá bálvalusaid sámegillii. Go eai leat liikká nagodan ollašuhttit, dat lea eará, muhto giellalága njuolggadusat gal geatnegahttet maiddái Fylkkamánni, dadjá Marianne Balto.

Bearráigeahččit
Balto dadjá maid ahte Fylkkamánni han lea guhte galgá bearráigeahččat eará ásahusaid aiddo fal giellalága ja njuolggadusaid ektui. Son čujuha dan ovddasvástádussii mii guoská ollašuhttit dáid lágaid. Son maid namuha dan maid skuvllat bihtet ollašuhttit sin geatnegasvuođa daid sámi mánáid hállangiela.
 – Sis han leat nu ollu bearráigeahččandoaimmat ja berrejit dákko bokte mannat ovdamearkan vai ieža bastet čuovvut njuolggadusaid maid galget gozihit, loahpaha Sámedikki várrepresideanta Marianne Balto.

Uhcán ruhta
Fylkkamánni hálddahusa hálddahushoavda, Geir Arne Eriksen, mieđiha ahte sii dovdet ášši ja leat bargamin dáinna váttisvuođain. Son muitala ahte sii barget departemeanttain ja oažžut dan gelbbolašvuođa nu ahte sii nagodit addit dan ođasmahttima mii lea dárbbašlaš áiggis áigái. Son gal maid mieđiha ahte sii eai leat gal ohcan bargi justá dán virgái ja eai leat almmuhan virggi.
 – Mii diehtit bures min geatnegasvuođa giellalága ektui ja mii leat ožžon moaitámušaid dan geažil. Dán leat mii váldán ságastallamii iežamet departemeanttain máŋgii, muhto ii leat vuos dáhpáhuvvan mihkkege ruđalaččat dán áššis, čilge Eriksen, ja čujuha alddis Fylkkamánni eambbo vástidit.

Oktasaš čoavddus
Sadjásaš Fylkkamánni, Tor Staffsnes, diehtá muitalit ahte sii leat bargamin áššiin. Sin neahttasiiddut leat čadnon oktasaš guovddážii buot Fylkkamánni ámmáhii. Son diehtá muitalit ahte sii leat bargamin áššiin eiseválddiiguin ahte galgá boahtit sámegillii buot fylkkamánniid neahttasiidduin.
 – Mii eat jođit báikkálaš proseassa dás ja min departemeanta lea bargamin gávdnat čovdosiid muhto eat leat vel geargan dáinna. Dát galget ođasmahttot dađistaga ja dát gullá buot fylkkamánniid ámmáhiidda, čilge Tor Staffsnes.

Lasit: del.icio.us | Digg