Suoláduhtten bissu, silbbaid ja ruđaid

Guovdageainnu boazodoalli Márjjá-Niillas, gii navdo Norgga riggámus boazoeaiggádin, lea suoláduhtten iežas viesus sihke divrras bissu, silbbaid ja ruđaid. – Mun in oba višage muitalit man olu ruđa suollagat dolvo, dadjá son.

Márjjá-Niillas lei siiddas leamašan máŋga vahkku, ja viessu lei báhcán ávdin váhku áigi, go su eamit vulggii gárdde lusa. – Go bođiime eamidin ruoktot gaskavahkku, de fuomášeimme ahte suollagat ledje gaikon sisa munno vissui, muitala Márjjá-Niillas, Nils Aslaksen Siri.

Cuvkon láse ja uvssa
Niillasa viessu mii lea Suomaluottas, Guovdageainnus, lea aitto geaidnu guora,  muhto dat ii hehtten suollagiid suoládeamis vearjoskábe, mas lei sihke bissu, silba ja olu ruhta. – Suollagat leat duogábeale viesu cuvken kontorlánjá láse, ja dákko čađa sisa boahtán. Suollagat leat maiddái gaikon oađđinlanja uvssa, gos vižžege munno dávviriid, muitala Niillas.

Muittut ja árvu
Vearjoskábes maid suollagat dolvo, ledje dávvirat ja ruđat main ledje sihke muittut ja stuorra árvu. – Skábes lei divrras bissu ja olu ruhta, muhto buot vearrámus leat muittut mat jávke silbbaid mielde, dadjá Niillas, ja čilge ahte doppe ledje sihke riskkut, silba boahkánat ja eará silba skeaŋkkat maid soai leigga eamidin ožžon. – Dáhkádusfitnodat dieđusge gokčá buot masson dávviriid, muhto ruhta maid oažžu gihtii, ii dan dihte buvtte skeaŋkkat ja divrras dávviriid ruovttoluotta, muitala Niillas. Viesu olggobealde galgá maiddái reahka leat jávkan.

Máŋga suollaga
Márjjá-Niillas árvvoštallá ahte suollagat mat leat leamašan jođus leat máŋggas, go leat nagodan guoddit vearjoskábe. – Dás lea sáhka skábe birra mii lea láhka 2 m állat, ja moadde čuođe kg deaddá. Dan ii nagot gal olmmoš okto dahje guovttá fievrredit. Dása adnojit veahkit. Lea maiddái mearkkašahtti veara ahte suollagat leat diehtán nu justte gokko mus lei dat skábe, go eai leat ruiven eará dan lanja gokko leat sisa boahtán, ja mánnan njuolga oađđinlatnjii. Dasa lassin orrot suollagat bures diehtán mun lean leamašan meahcis, go leat deaivan justte dalle gaikut viesu, lohká Márjjá-Niillas.

Opmodat diehtun
Norgga vearroeiseválddiid 2008 dieđuid mielde lei Nils Aslaksen Siris opmodat láhka 5 miljovnna, ja dienas badjelaš millijovnna. Son lea ge maiddái dat boazodoalli Norggas gii oaččui eanemus boranávdevahátmávssu dán jagi - badjel 700 duhát ruvnno. Liikká ii jáhke son ahte dan dihte leat suollagat fuobmán ahte son lea jábálaš olmmoš. - Dat ii leat easka ođas ahte mus lea opmodat. Danne in jáhke dáid dieđuid váikkuhan ahte suollagat leat mu vissui gaikon, loahpaha son.
Politiijain Guovdageainnus eai leat dađi eanet dieđut áššái, earret go ahte dál leat viežžan veahki Álttá politiijain, dutkan dihte ášši, dieđiha Oarje-Finnmárkku politiijaguovlu.

Lasit: del.icio.us | Digg