Buohcci sirdán hivssegii

Alzheimer Demente buohcci Katrine J. Boine Sara (76) šaddá oađđit Kárášjoga Dearvvašvuođaguovddáža hivssegis go leat unnán lanjat. – Dát leat gutnehis fálaldat, dadjá eatnis veahkkehoavda Ingolf Balto.

Maŋŋebárgga sirddii Kárášjoga Boarrásiid Siida buohcci boaresolbmo, Katrine J. Boine Sara (76), ossodaga váldobasadanlatnjii ja hivssegii. Kárášjohkalaš Ingolf Balto muitala eatnis leat Alzheimer Demente buohccin ja oaččui dasa lassin smávva vuoiŋŋamašvardima 2009 juovlamánus.
 – Go moai eamidiin finaime eatni maŋŋebárgga galledeamin, de ieš eadni vávjjii ahte su ledje sirdán hivssegii. Eadni logai su sirdán dohko go sápmelaččaid badjelgehččet. Son navdá son lea eará báikkis go Kárášjogas, čilge eatnis veahkkehoavda Ingolf Balto eatnis dili Kárášjoga Dearvvašvuođaguovddážis.
 Balto lea duođaštan dili govaiguin máid lea luoikan Ávvirii čájehan dihte mot gieldda meannuda buohcci, vuoras olbmuid.

Váimmu bávččagahttá
Ingolf Balto muitala soai eamidiin eaba nagodan Katrine láidet hivssegii nohkkat go dát bávččagahtii sudno váimmu. Balto muitala eatnis, Katrine J. Boine Sara, šattai Kárášjoga Dearvvašvuođaguovddážii juovlamánus.
 – Buohcci gii lea muittohuvvan, ii leat vejolaš dikšut birra jándora ruovttus, čálii Dearvvašvuođaguovddáš midjiide. Ovddit beaivvi bođii fálaldat eatni sirdit Levdnjii, «Helsetunii», lohká Balto ja dan mearrádusa lea son váidán.
 Son lohká iežaset ballat Katrine šaddá nu okto go ii gulahala, go doppe gullo eanaš dáro- ja suomagiella.
 – Dál lea eadni ain dan muttos ahte dovdá min ja lea nu movttat go fitnat. Mii ballat ahte son manná maŋosguvlui. Mii eat astta nu dávjá fitnat Leavnnjas go buohkat leat barggus ja šaddá maid váddásut su ruoktot viežžat, joatká Balto.

Dohkketmeahttun vuoruheapmi gielddas
Dearvvašvuođaguovddážis livčče guokte kantuvrra lanja, muhto leat menddo baskkes uvssat. Balto lohká iežas fállan galjedit daid uvssaid, muhto dan eai háliidan, ja dasa lassin bukte nuppi ákka ahte gielddas eai lean doarvái bargit.
 Balto mielas vuoruhit Kárášjoga gieldda politihkkárat boastut go eai vuorut boares olbmuid fálaldaga buorebut, vaikko dihtet boares olbmot ellet guhkit go ovdal ja boares olbmuid lohku lassána jagis jahkái.
 – Mu mielas eai oro gielddas váldimin dan duođalaččat. Eará gielddain lea buorebut ráhkkanan. Mii eat sáhte vuordit ahte mánát galget min beaivvi fuolahit ja gohcit ija, lohká Balto.

Lasit: del.icio.us | Digg