Boazosápmelaččat skuvlejedje stuorra NRK

Norgga Boazosápmelaččaid Riikkasearvi vuittii váiddaášši NRK Spekter vuostá. NRK dubmehalai go ii lean viežžan vástádusaid čuoččuhusaide boazodolliin. – Mii leat duhtavaččat duomuin, lohká Norgga Boazosápmelaččaid Riikkasearvvi ovdaolmmoš, Nils Henrik Sara.

Ikte meannudii Preassa Fágalaš Lávdegoddi (PFL) váiddaášši maid Norgga Boazosápmelaččaid Riikkasearvi (NBR) lei sidjiide váidán. Lei mannan čavčča gos NRK Spekter nammasaš prográmma gieđahalai earret eará dilálašvuođaid gaskal eanadoalu ja boazodoalu Finnmárkkus. NBR lei váidán ášši go sin mielas prográmmas ledje garra čuoččuhusat ealáhusa vuostá ja maidda eai beassan prográmmas vuosttildit. NBR maid ii dohkkehan NRK čovdosa, ahte boazodoallohoavda ja Norgga Sámiid Riikkasearvi vástidedje boazodoalu ovddas. Dát ii lean sin mielas dohkálaš ja danne váide Spekter prográmma PFL:i.

– Šluđasvuohta
PFL meannudeamis ledje lahtut ovttaoaivilis ahte boazodoallit nu garrasit fallehuvvojit čuoččuhusaid bokte Spekter prográmmas, ahte sii galggaše beassat vástidit. PFL maid cuiggoda dan go boazodoallit eai leat beassan studiodigaštallamii, mii ii lean njuolggosátta, muhto čuhppojuvvon oassi prográmmas. Ovddeš PFL jođiheaddji Per Edgar Kokkvold moittii erenoamážit dan go eai leat ná garra čuoččuhusaid maŋŋel gillen jearahallat boazodolliid ja gohčodii dan njulgestaga šluđasvuohtan. Čoahkkimis maid gávnnahedje ahte dán áššis ii lean doarvái jearahallat boazodoallohoavdda ja NSR politihkkára, muhto ahte livčče galgan maid jearahallat muhtuma gii ovddasta boazodolliid. PFL háliida maid deattuhit ahte sii eai hálit nu stivret dákkár áššiid ahte álohii lea balánsa, muhto sin mielas ledje goitge Spekteris nu roavva čuoččuhusat ahte ferte viežžat vástádusa sivahallon bealis.  

Duhtavaš duomuin
Go Ávvir ikte riŋgii NBR jođiheaddjái Nils Henrik Sarai, de lei son maid aiddo gullan duomu, muhto ii diehtán maidege makkár eavttut duomus ledje, dušše dan ahte Preassa Fágalaš Lávdegoddi lei vuhtii váldán sin váidaga ja dan sivas dubmen NRK dán áššis ja son cealká ahte son gal dieđusge lea duhtavaš duomuin. Sara mielas čájeha dát ášši ahte ođasdoaimmahagat, maiddái riikaviidosaš stuorra NRK, fertejit leat várrugasat.
  – Dát ášši muitala ahte Norgga ođasdoaimmahagat fertejit leat eambbo várrugasat go fievrridit dakkár áššiid main eai leat sihkkarat devdet go njuolggadusaid maid mielde leat biddjon bargat, lohká Sara.

Ii beassan radios moaitit
PFL maid háliida ávžžuhit NRK váldit oktavuođa boazodoalu ovddasteddjiide, vuoi besset vástidit čuoččuhusaide eará prográmmas mii sáddejuvvo maŋŋel. NBR jođiheaddji diehtá maid muitalit ahte maŋŋá dán Spekter prográmma jearahii su muhtin journalista NRK Sámi Radios. Go ledje gollan muhtin beaivvit, de son riŋgii dán journalistii ja jearai gosa bat diet ášši lei šaddan sivas go dát han galggai sáddejuvvot fargga.
 – Dalle lei vástádus ahte sii eai sádde diekkár jearahallamiid mat moitet sin ásahusa, ja vel ahte son humai nu garrasit sin bargovuogádaga vuostá ja dat ii lean dohkkehuvvon NRK vuogádaga siskkobealde, muitala Sara.

Nu ahte dát lea vuoitu maiddái Sámi Radio vuostá?
– Mon gal in dieđe makkár bargonjuolggadusat sis leat, muhto lea ain juo oalle čielggas NRK:i goit dál, ahte sii geat doppe mearridit goit galget njuolggadusaid čuovvut. Mon gal ipmirdan ahte Sámi Radio ášši galggai dušše jávohuvvat, čilgii NBR ovdaolmmoš Nils Henrik Sara.
    Loahpas vel háliidii čilget ahte go boazodoalus lea sáhka boahtteáiggis, de čájeha dát ahte boazodoallu galgá beassat oainnustis čilget, ja ii leat nu váttis su dieđu mielde gávdnat luohttevaš olbmo gii sáhttá juoga vástidit.

Lasit: del.icio.us | Digg