Váldosiidu-Hovedsiden | Ođđasat | SomBy buoret go JAY-Z

SomBy buoret go JAY-Z

Fonta sturrodat: Decrease font Enlarge font
image Dá lea SomBy joavkku ođđa singelskearru "Ii iđit vel". Singelskearru olggoš

SomBy joavku lea buoret go máilmmi stuorámus násttit Suoma popmusihka singellisttus.

Sámi rockjoavku SomBy lea ovccádin YLE vierkkálaš singellisttus iežaset ođđa singelskearruin  "Ii iđit vel". Sii álmmuhedje singelskearru juovlamánu nuppi beaivvi ja dál sii leat beassan meaddil muhtun máilmmi buoremus násttiid.
 – Mii leat gorgŋon bajás listtus hui johtilit ja dat lea issoras somá. Leat mannan meaddil muhtin máilmmi buoremus násttiid, dadjá SomBy gitáračuojaheaddji, Oula Guttorm.

Buorre jahki
Gitáračuojaheaddji muitala sis leamaš issoras buorre jagi ja doaivva lea boahtte jahki maid buorren.
 – Leat vuoitán vaikke makkárlágan bálkkašumiid, gilvvuid ja dál leat singelskearru almmuhan. Jáhkku lea boahtte jagi šaddat vel buorebun, muitala Oula.
 – Mii fertet doalahit dán almmuheami mii mis lea dál leamaš, vai mii beassat čuojahit konsearttaid ja čájehit min sámemusihka, dadjá Oula Guttorm.

Doaivva
Oula Guttorm muitala sis lea doaivva ahte festiválat diŋgojit sin boahtit čuojahit go sii leat dál logi buoremusaid searvvis Suoma singellisttus.
 – Mun doaivvun festiválaid bovdet min čuojahit miehtá Suoma ja maiddái Norggas ja Ruoŧas. Leat smiehttan giđabeallái johtit ja doallat lagabui guoktelogi konseartta, muitala Oula Guttorm.
 Son muitala sis lea maiddái doaivva čuojahit Gaska-Eurohpás boahtte jagi, muhto dat lea ain eahpesihkar.

Skearru
Guttorm muitala iežaset áigut almmuhit skearru boahtte jagi, muhto lea ain eahpesihkar goas sii dahket dan.
 – Mii leat smiehttan ahte áigut almmuhit skearru muhtin beaivvi gaskal ođđajagimánu ja njukčamánu. Livččii hirbmat heivvolaš almmuhit skearru sámi álbmotbeaivvi, lohká gitáračuojaheaddji Oula Guttorm.

SomBy joavku lea vuoitán Sámi Grand Prix gilvvu mannan giđa ja vel vuoitán Liet gilvvu mii lágiduvvui Hollánddas golggotmánus.
  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii