Váldosiidu-Hovedsiden | Ođđasat | Ođđavarat bargosajit Divttasvuonas

Ođđavarat bargosajit Divttasvuonas

Fonta sturrodat: Decrease font Enlarge font
image GÁFE NÁVDDAŠIT: Lea buorre návddašit gáfe siste dan botta go olgun bosoda riđđu. Kenneth Amundsen (gurut bealde), Karstein Amundsen, gii ordne viessogálvvuid, Knut Are Langås ja Johnny Andersen vuoiŋŋastallet dan botta go lea beare dálki vuolgit meara nal

Njeallje nuorra bártni ásahedje buokčanfitnodaga, oste alcceseaset fatnasa ja dál mannáge hui bures dáinna fitnodagain Ájláddes,

Biksa Havbruksservice AS fitnodagas leat dál guhtta nuora ja Lars Theodor Kintel lea stivrajođiheaddji ja Kenneth Amundsen beaivválaš jođiheaddji. Earát leat Knut Are Langås, Inge Olsen, Johnny Andersen ja Idar Kintel, ja sii leat buohkat gaskal 19-27 jagi boarrásat. Sii leat dohkkehuvvon doaibmat bargobuokčin. Ásaheapmi lei diibmá ja fitnodat lea ožžon golmma jahkásaš šiehtadusa Sponfish-gruppen ASA:in man ovddas sii galget doaimmahit buokčamiid. Sponfish doaimmaha dorskebiebmama Divttasvuonas.
 Nuorat fertejedje háhkat albma fatnasa vai lea vejolaš jođihit doaimma. Fanas "Geira" mávssii 1,3 miljovnna ruvnno earret lassiárvodivada. Dát fanas lea Viknes 880 mas lea 240 heastafámot Yanmar mutuvra mas gaskamearálaš leahttu lea 22 knohpa, ja dat gierdá vaikko makkár dálkki. Ruhtadeami dáfus lea Innovašuvdna Norga juolludan 470.000 ruvdnosaš doarjaga ja Sámediggi lea dorjon 280.000 ruvnnuin. Minddar leat sii ruhtadan fitnodaga loanain ja iežaskapitálain.

Movttiidahtti
– Dan gal bures diehtá. Mii leat nuorat ja de lea váttis gávdnat stuora iežaskapitála. Dan dihte leage buorre ja hui movttiidahti go oaččuimet almmolaš doarjaga ja dat leige mearrideaddjin, lohket nuorat go ásahedje alcceseaset bargosaji.
 Juste dál leat sii gárveme bargoguovddáža. Dat lea huksejuvvon priváhta bruggii maid sii leat váldán badjelasaset. Bargoguovddážis galget buot rusttegat ja bargoneavvut maid sii dárbbašit fitnodaga jođiheamis. Doppe lea kantuvra, boradanlatnja ja vuoiŋŋastanlatnja gos besset vuoiŋŋastallat bargguid gaskkas. Dasa lassin lea maid kompressorlatnja vai álkit besset deavdit áibmobohttaliid.

Buorre jahkebealli
– Dát galgá doaibmat midjiide guovddážin. Nu go ovdamearkka dihte odne go lea riđđu ja de mii eat sáhte vuolgit meara nala bargat. De leage vuogas go mis lea báiki gos orrut dan botta. Lea maid buorre go beassat bargat visttiin vai geargat dálvái, lohket nuorat gáffebottus.
 Biksa Havbruksservice AS lea doaibman jahkebeali ja lea sierraluvvan guollebiebmanrusttegiid ovddas buokčat.
 – Mis lea leamaš olu bargu álggu rájes juo ja mii leat golmmas ain barggus hávális. Mii bargat dorskebiebmanrusttegiin ja doppe mii iskat leat go mearddit čavdásat. Min vahkkosaš barggut váldetge olles bargoáiggi, muitala beaivválaš jođiheaddji Kenneth Amundsen.

Boahtteáigi

– Midjiide geat orru siskkimusas Divttasvuonas lea dát buorre birgenvuohki, nu guhká go dorskebiebmamis lea positiivvalaš ovdáneapmi. Dan dihte leage dát gelddolaš álgu go mii leat oassin das mii dáhpáhuvvá Divttasvuona mearalaš birrasis, čilge Amundsen.
 Biksa Havbruksservice vuoruha ollislaččat bargguid maid sii leat ožžon guollebiebmanealáhusas. Iige leat báljo dilli eará hommet. Muhtun smávva bargguid priváhta olbmuid ja suohkana ovddas gal soitet astat. Geasseturismma ovddas buokčat gal ii leat vel vejolaš.
 – Lea sihkkarit vejolaš oažžut diŋgojumiid dies maid namuhat, muhto juste dál ii leat go dorski birra sáhka. Buokčan lea hirbmat somás bargu, go dat han lea maid min astoáiggehommá. Jus dattetge ilbmet miellagiddevaš prošeavttat, de mii gal soaitit daid árvvoštallat, muhto dassážii mii gal vuoruhit guollebiebmama ovddas bargat, loahpaha beaivválaš jođiheaddji.


  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii