Válljejuvvui presideantan

Ovddeš várrepresideanta Odd Erling Smuk válljejuvvui máilmmi boazoálbmogiid searvvi presideantan.

Máilmmi boazoálbmogiid searvvi ovddeš várrepresideanta Odd Erling Smuk válljejuvvui searvvi presideantan jagi 2013 rádjái.
 – Vuosttamužžan áiggun giitit luohttámuša ovddas, logai Smuk sárdnestuolus maŋŋel go lei válljejuvvon.

Álggaheamis mielde
Smuk lea leamaš mielde ásaheame searvvi jagi 1997:s, ja son álggahii ge sártni muittašit movt searvi álggahuvvui.
 – Jagi 1991:s ilmmai jurdda álggahit dán searvvi, muhto dalle jearaimet alddiineamet duostat go mii álggahit dakkár máilmmiviidosaš searvvi. Guokte jagi maŋŋel, jagi 1993:s doalaimet feastta Romssas gos fas badjánii sáhka cegget dán searvvi. Nu ásahuvvui searvi jagi 1997:s, muitalii Smuk oanehaččat movt searvi ásahuvvui.

Viidánan
Válljejuvvon presideanta ja ásaheaddji ii lean vuordán ahte searvi galggai gokčat ná stuora guovlluid ovdal go bidje johtui searvvi.
 – Mun in lean jurddašan ahte searvi boahtá gokčat nu viidát boazodoalloálbmogiid, ahte ná olu riikkat servet searvái nu go Kiinná mii lea aiddo searvan. Dasa lassin leat Alaska ja Kanada maid čájehan beroštumi searvat, dajai Smuk.

Gozihit FN
Kongreassa bargu lea gozihit earet eará ON (Ovttastuvvon Našuvnnaid) riikkaidgaskasaš searvvi mii bargá álbmot riekti gažaldagain.
 – Mii sihkkarastit iežamet riikkaid vai ON ii beasa oađđit álgoálbmotáššiid dáfus. Mii leat oaidnán movt Suomas ja Ruoššas lea geavvan go mii eat čuovo mielde, logai Smuk.

Oahpásnuvvan guovddážis
Searvvi ulbmil lea álgguráje leamašan čatnat boazodolliid lagabui ja danin lea searvi deattuhan ahte álbmogat galget oahpásnuvvat.
 – Mis leat unnán čoahkkimat, muhto mii eat dušše čoahkkinastte. Mii oahpásnuvvat iešguđet guovlluide mii lea searvvi ulbmil leamaš álggu rájes, muitalii presideanta.
 – Lea somá digaštallat olggobealde čoahkkinlanja. Mun lean ožžon buori jurdagiid movt sáhttá konkrehtalaččat bargat searvvi hástalusain ovddasguvlui, logai Odd Erling Smuk loahpalaččat.  

Lasit: del.icio.us | Digg