Váldosiidu-Hovedsiden | Ođđasat | Vuite goalmmát jagi maŋŋálaga

Vuite goalmmát jagi maŋŋálaga

Fonta sturrodat: Decrease font Enlarge font
image Láhppon Gánddat vuite Juovlačiekčamiid Kárášjogas mannan vahkkoloahpa. Duogábealde: Marius Bekkelund, Martin Norbye, Jan Børre Hansen, Kai Ruben Høgden. Ovddabealde: Hans Norbye, John Einar Eira Jr., Dag Andreas Balto ja Johan Ante Logje (Buot govat: Nils

Gelddolaš juovlačiekčamat Kárášjogas dolvo Láhppon Gánddaid vuot bajimussii.

 – Mis lei plána vuoitit, ja dan nagodeimmet dán jagi maid, illuda Láhppon Gánddaid čiekči, Dag Andreas Balto.
Mannan vahkkoloahpa ledje jahkásaš juovlačiekčamat Kárášjogas. Lei Kárášjoga A-joavku mii láidedii čiekčamiid, mas čieža nissonjoavkku ja 14 dievdojoavkku serve. Oktiibuot čikče 200 áŋgiris spábbačiekči, Kárášjoga valáštallanhállas.

Gelddolaš finála
Guokte jagi ovdal leat Láhppon Gánddat vuoitán juovlačiekčamiid, ja dán jagi ledje maid oiddohat. Finálii beassat ii lean váttis, muhto doppe ožžo ge garra gilvvu. Finálas deaivvadedje STIL joavkkuin.
 – Álggos leimmet 2-0 ovdalis, muhto de ožžo sii maid moalaid. Go dábálaš áigi, guovtte geardde 10 minuhta, lei nohkan, de lei boađus 3-3, muitala Dag Andreas Balto.
Bártniid finála fertii de mearriduvvot liigečiekčamiid bokte.
 – Šattai «sudden death», gos juohke láhka fertii váldit ovtta ja ovtta čiekči olggos. Mun ja Jan Børre váldojuvvuime olggos, ovdal go Martin Nordby, goalmmát liigeminuhtas, bážii moala, muitala Balto roahkkadit. Láhppon gánddat vuite de finála 4-3.   

Buoremus báhčči
Dag Andreas Balto bážii maid eanemus moalaid, ja šattai buoremus báhččin.
 – In doivon olahit dan, go finálas váldojuvvojin olggos. Martin han bážii guokte moala finálas, ja de  doivon son manná mu meattá. Muhto mun šadden buoremus báhččin, ja dat lea hui somá, muitala Balto, gii bážii oktiibuot 11 moala.
 – Ferten gal rámiidit iežan lága čikčiid. Mis lei hui buorre joavkočiekčan, ja dan dihte doaivvun manai ná bures, lohká son.

Buoremus báhčči nissoniid joavkkuin šattai Camilla Høybakken, Golden Girls. Son  bážii maid 11 moala. Ruth Thomassen, Guovdageainnu Násti Nieiddat, šattai buoremus čiekčin nissoniid gaskkas. Lei ges Hans Norbye, Láhppon Gánddaid čiekči, gii šattai buoremus čiekčin dievdduid gaskkas.
 
Boahtte jagi maid
Lágideaddji, Geir Mikal Boine, lohká duhtavažžan čiekčamiiguin.
 – Lei ollu olmmoš hállas geahččame čiekčamiid, ja sii ledje hui mielde, lohká Larsen Utsi.
Eai Láhppon Gánddat leat gallánan, vaikko dál leat vuoitán golbma jagi maŋŋálaga.
 – Mii čiekčat fas boahtte jagi, ja vuoitit de maid, lohká Dag Andreas Balto.
  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii