Oasit
– Govva dohkke duođaštussan!
Fonta sturrodat:
Vuosttaš gova berret govvet nu ahte oidno makkár boazu lea goddon, movt lea vardán eatnamii ja luottaid birra ealli jus lea dálveáigge govvejuvvon.
Boraspiresemináras cuiggoduvvui go Stáda luonddubearráigeahčus leat nu unnán olbmot barggus Guovdageainnus. Dilli galgá buorránit boahtte jagi ja dál dohkkehit govvaduođaštusaid go bargit eai olle miehtá.
Magne Asheim, Stáda luonddubearráigeahču Finnmárkku jođiheaddji dovddahii ahte viiddis Guovdageainnus ii geargga okta olmmoš miehtá ja ahte doppe lei galgat goit okta bargi vel. Son diđii jeđđet ahte dál šaddá maid Finnmárkui ortnet boraspire oktavuođaolbmuiguin.– Juohke johtolagas galggašii oktavuođaolmmoš, guhte dovdá guovllu. Vai olle jođánit geahččat ealli, lei boazobargiid vástádus.
Juohke johtolahkii
Dan sáhtii SLB bargi Henrik I. Eira duođaštit ahte nu lea oaivvilduvvon.
– Galgá šaddat okta boraspireoktavuođaolmmoš juohke johtolahkii boahtte jagi mielde, dajai son.
Ii dárbbaš gillát
Boraspirečoahkkimis šattai hui čielggas ahte boazodoallit fertejit dárkileabbon šaddat duođaštemiin. Dassážii go Luonddubearráigehččui álget eambbo olbmot bargui, de lea vejolaš duođaštit ráppiid govain. dasa leat dihto eavttut.
– Boazoeaiggát ii galgga gillát danin go mis leat unnán bargit. Govva mii dušše čájeha jápmán bohcco ii dohkke, dieđihii Asheim ja čájehii movt galgá govvet.
Govát dohkkejit
Son bivddii boazoeaiggádiid guđet gávdnet ráppiid dieđihit rábbetelefuvdnii (nummár 95813908) mii lea doaimmas vuosttaš árggas gitta geassái. Jus Luonddubearráigeahču bargit eai sáhte boahtit, ja boazoeaiggádis ii leat vejolašvuohta doalvut bohcco kontainerii márkanii, de sáhttá lihkká govet ráppi.
Olu govaid
Dušše govvaduođaštusat mat leat dieđihuvvon rábbetelefuvdnii dohkkehuvvojit.
– Berre govvet olu govaid, ovtta vai oaidná makkár ealli lea, nuppi lagabus vai oaidná gokko meahcceealli lea gáskkestan/snelken/gaccestan, ja de goalmmáda go lea njalddestan dakko, ja govvet náhki vuolde vai oaidná bátnesajiid bierggus, de gal dohkke govva duođaštussan, lohpidii Asheim.
Vurke
De berre vurket juste dan oasi bohccos gokko lea gáskkestan. Olles bohcco ii dárbbaš vuorkut, earretgo jus goaskin lea čuolastan čielgái.
– Ráppi ii galgga dárbbašit vurkkodit guhkit go vahkku, lohpidii Asheim guhte lei duđavaš čoahkkimiin boazodolliiguin.
E-poasta du skihpárii
Čálihanversudvna
Dábálaš teaksta