– Sámedikki vehkiin oastit bohccuid

– Mu oainnu mielde ii leat boastut ahte Sámediggi veahkeha nuoraid oastit ealáhan bohccuid, ja dan vejolašvuođa addá mu evttohus bušeahtas, dadjá Åarjel Læstoe áirras Kirsten Appfjell-Eira.

Appfjell-Eira leage evttohan ahte ásahuvvo etablerenstipeanda boazodoallonuoraide, geat aiddobáliid leat álgán boazodoaluin.
 – Dat dieđus lea hui jorbasit daddjon. Dat dieđus mearkkaša ahte Sámediggi sáhttá addit nuoraide doarjaga oastit ealáhan bohccuid, lohká Appfjell-Eira.
 Dasa leage sus juo doarjja NSR:s, Guovdageainnu Johttisápmelaččaid Listtus, SáB:s ja Čielga Sámi Jienas.

Eai beasa oastit
Kirsten Appfjell-Eira mielas lea buorre jus Sámediggi dán doarju ihttin.
 – Ovdal ii leat ulbmiliid vuolde ná čielgasit daddjon ahte boazodoalu nuorat galget vuoruhuvvot, lohká son.
 Appfjell-Eira oaidná dárbbu ahte Sámediggi vuoruha boazodoalu nuoraid geat aiddobáliid leat álgime ealáhusain.
 – Boazodoalu Ovdánahttinfoanddas lea dán áiggi veadjemeahttun nuoraide oažžut doarjaga oastit ealáhan bohccuid. Danne oainnán dehálažžan ahte dat vejolašvuohta rahppo Sámedikki vuogádagas boazodoalu nuoraide, lohká Appfjell-Eira.

Doarjjastivra
duohken
Kirsten Appfjell-Eira aŋkke dadjá ahte dákkár ortnet dieđus lea jurddašuvvon nuoraide geain lea vejolašvuohta oažžut iežas siidaoasi.
 Son liikká mieđiha ahte Sámedikki njuolggadusat eai daja dan birra maide, iige ahte ovttage nuora ohcat doarjaga oastit ealáhan bohccuid.
 – Dieđus sáhttá nu geavvat ahte Sámediggái bohtet 3-400 ohcamuša. Muhto dalle šattašii dieđu Sámedikki doarjjastivra duohken mot meannudit ohcamiid, lohká Kirsten Appfjell-Eira.

Johtti Sápmelaččaid
Listu doarju
Guovdageainnu Johtti Sápmelaččaid Listtu sadjásaš áirras Berit Marie Eira ii leat ovttaoaivilis Åarjel Læstoe sámediggeáirasiin.
 – Mu oainnu mielde leat dat evttohus eambbo jurddašuvvon stipeandan nuoraide geat leat oahpahallin boazodoalus, go sis lea dál áibbas unnán doarjja máid ožžot mánnosaččat, lohká Eira.
 Iige son oainne vejolažžan oba ohcatge ealáhan bohccuid oastinstipeandda Sámedikkis.
 – Dan hehtte ođđa boazodoalloláhka, čuoččuha Berit Marie Eira.

Lasit: del.icio.us | Digg