Orda massán stivrasaji

Ovtta dain stuorámus orohagain Oarje-Finnmárkku guovdojohtolagas ii leat šat stivralahttu johtolaga stivrras. – Dát ii leat dohkálaš, lohká Ordda ovdaolmmoš Anders Nils J. Gaup.

Golggotmánu 30. beaivvi doalai Oarje-Finnmárkku guovdojohtolat liige jahkečoahkkima gos earret eará válljejedje ođđa stivrra. Boađus válggain lea ahte ovtta johtolaga stuorámus orohagain, Orddas ii leat šat olmmoš stivrras. Boazodoallohálddahusa loguid mielde ledje Orddas mannan giđa badjelaš čieža duhát bohcco, 15 siidaoasi ja areála fas 416 km2.

Eai fástasajit
Guovdojohtolaga jahkečoahkkin ii dorjon boazodoallohoavdda evttohusa ahte stuora orohagat galget oažžut fásta stivralahtto­sajiid.
 – Boazodoallostivra hilggui maid dan evttohusa, go Boazo­doallolága mielde ii leat boazo­doallohoavddas vejolašvuohta ná stivret válggaid, čilge guovdo­johtolaga stivrra ovdaolmmoš Mathis A. Oskal.

– Ii dohkálaš
Orohat D-40 lea okta Oarje-Finnmárkku guovdojohtolaga stuorámus orohagain, ja orohaga ovdaolmmoš cuiggoda garrasit válggaid:
 – Dál go vuorbádemiin válljejuvvojedje stivralahtut, de šattai nu nu ahte okta dain stuorámus orohagain ii ožžon olbmo stivrii. Dat ii leat obanassiige dohkálaš, lohká Ordda ovda­olmmoš Anders Nils J. Eira. 

Unnit orohagain
– Min mielas ii leat dohkálaš go Orddas, gos leat 15 siidaoasi ii ožžon olbmo stivrii. Muhtun stivraláhtuin geat dál válljejuvvojedje ovddastit ovdamearkka dihte orohagaid main lea dušše okta siidaoassi. Dan dihte ii oro min mielas riekta ahte mis ii leat olmmoš stivrras, čilge Gaup.

Ráhkadit njuolggadusaid
Guovdojohtolagastivra galgá dál earret eará ráhkadišgoahtit doaibmanjuolggadusaid guovdojohtolatorohahkii. Boazodoallolága mielde galget njuolggadusat sihkkarastit orohaga guohtumiid ja sisttisdoallat dárkilis mearrádusaid earret eará guohtungeavaheami birra, boazo­logu birra  ja eará áššiid maid lea vuogas čielggadit orohaga doaibmanjuolggadusain. Stivra galgá maid ráhkadit plána mas čilgejit johtinvieruid, áigodat­guohtumiid, guottetbáikkiid ja čilget guohtunguovlojuogu.

Sáhttet leat váikkuhusat
– Dát leat dakkár mearrádusat mat hui olu mearridit mo mii doaimmahit boazodoalu. Jáhkán ge sáhttet leat stuora, ja maiddái heajos váikkuhusat midjiide go eat beasat leat mielde ráhkadeami njuolggadusaid, ballá Ordda ovdaolmmoš Anders Nils J. Gaup.

Árvvoštallet váidit
Ordda orohat ii leat vuos mearridan áigot go dahkat áššiin maidege dahje maid dahket.
– Mii fertet vuos árvvoštallat galgat go váidit válggaid, lohká Anders Nils J. Gaup vel.

Lasit: del.icio.us | Digg