Keskitaloi buot NSR-fápmu

Nu gártáge Keskitalo vuosttaš olmmoš NSR:s guhte sihke jođiha NSR ja seammás sáhttá gártat presideantan.

Norgga Sámiid Riikkasearvvi válgalávdegoddi evttoha Aili Keskitalo jođihit organisašuvnna ja leatge jearran Keskitalos miehtá go jođiheaddjin, ja Keskitalo lea mieđihan badjelasas váldit doaimma, muitala Aile Javo guhte jođiha NSR-válgalávdegotti.
 – Mii jearaimet Aili Keskitalos vuolgit jođiheaddjin dalá maŋŋá go Silje Muotka dieđihii ahte son ii šat joatkke doaimmas, ja mii leat hui duđavaččat go Keskitalo mieđihii jođiheaddjin vuolgit, muitala Javo.
Eat jearran earáin
NSR-válgalávdegotti jođiheaddji Javo muitala sin gulaskuddan ollu NSR olbmuin gean sii dáhtošedje jođiheaddjin.
 – Eatnasat geaiguin mii leat háleštan, sihte Aili Keskitalos jearrat, ja Kárášjoga ja Deanu Sámi Searvvit leat dál almmolaččat dieđihan ahte sii dorjot Keskitalo, eatge mii lávdegottis de leat jearran ovttage earás, muitala Javo Ávvirii.

Buoremusat okta njunuš olmmoš
Aile Javo muitala ahte sii válgalávdegottis leat nannosit árvvoštallan šaddá go beare stuorra noađđin ovtta olbmui sihke leat presideantan ja jođiheaddjin.
 – Mii leat árvvoštallan dán dárkilit, ja leat gávnnahan ahte dán gal nákce Keskitalo, dasa lassin han ii leat okto go su leat sihke NSR sámediggejoavku ja maiddái NSR stivra veahkkin ja doarjjan, čilge Javo.
 – Dasa lassin oaivvildat válgalávdegottis ahte buoremusat NSR:i ahte mis lea okta ja seamma olmmoš sihke presideantta evttohassan ja jođiheaddjin, lohká NSR válgalávdegotti jođiheaddji Aile Keskitalo.

Lasit: del.icio.us | Digg