NSR ovddida odne EAHPELUOHTTÁMUŠA 

Geir Tommy Pedersen (NSR) duođašta ahte sii ovddidit odne eahpeluohttámuša sámediggeráđđái. – Min mielas ii leat Bargiidbellodat ja sámediggeráđđi bargan doarvái buori barggu. dadjá son.

Norgga Sámiid Riikkasearvvi (NSR) parlamentáralaš nubbinjođiheaddji, Geir Tommy Pedersen, Sámedikkis, lohká NSR bidjá otná eahpeluohttámušgažaldaga Sámedikki dievasčoahkkimis. Son čilge leat olu ákkat čoagganan dáid jagiid go Bargiidbellodagas (Bb) leamaš eanetlohku Sámedikkis.
 – Mii fertet jearrat leatgo Sámediggepresideanta Egil Olli rievttes olmmoš ovddastit sámi álbmoga ovddasguvlui, lohká Pedersen ja čujuha NRK Brennpunkt prográmmii gos Olli jienasteddjiid mielas leat doŋgget vástidan.  

Sáme politihkka bázahallan
Geir Tommy Pedersenas leat olu ákkat manin Bb berre čáhkket saji NSR:ii. Son muitala NSR mielas ii leat Bb nagodan jođihan sámepolitihka mo livčče galgan. Son muittuha ahte Bb Sámedikkis rábmui sis lei nu oanehaš gaska guovddáš Bb ráđđehusas. Duohtavuohta, lohká son, leat ahte ii leamaš goassege Sámedikkis nu heajos oktavuohta ráđđehusain go dál. Pedersen lohká oktavuohta gaskal Eanadoalu- ja Biebmodepartemeanttain ja Egil Olli joavkkuin leamaš nu heittot ahte Olli fertii Stuorradikki opposišuvnna bellodagaiguin bivdit veahkki oažžut departemeantta ságaide. NSR moaitá maid Bb oktan ovttasbargoguimmiiguin heajos bargu bargan dasa mii guoská riddoguolástanvuoigatvuođaide, ja lea maid váidalahtti ahte Bb ii leat nagodan ovddidit iežaset politihka dan áigodagas go leamaš fámus.
 – Dan bottago Bb leamaš fámus lea sámi politihkka bázahallan mealgat, deattuha Pedersen ja lohká NSR mielas lea áigi Egil Ollis guođđit Sámediggi presideantta ámmáha.

Ođđa bušeahtta evttohus
Bb lea evttohan iežaset 2012 Sámedikki bušeahtas sihkut buot juolludemiid smávit ásahusaide. Muhto NSR áigu baicce juohkit dan ruhtabihtáža juohke ásahussii amas eai jávkka bušeahtas. Jus eanetlohku dievasčoahkkimis čuovvolit NSR evttohusa, de beassá NSR eanetlohkui. NSR lea 13 áirasa ja Bb lea 14. NSR lea ráhkkanan beassat eanetlohkui ja lea ráhkadan sierra Sámedikki 2012 bušeahta evttohusa.
 – Dás várret 15 millijovnna kruvnna sihkkarastit riddoguolástan vuoigatvuođaid. Dát ášši lea menddo maŋŋonan. Mii leat vihtta badjel 12 joavdan ja mis ii leat áigi šat ájahallat dáinna áššiin, dadjá Geir Tommy Pedersen ja deattuha sii gal sáhttet ovttasbargat vaikko makkár bellodagain, earret Ovddádusbellodagain geat háliidit heaittihit Sámedikki, lohká NSR parlamentáralaš nubbinjođiheaddji, Geir Tommy Pedersen.
 Ii oktage daid smávit bellodaga áirasiin háliidan nu olu dadjat, muhto BB duođaštii sin bovden Johttisáme Listtu ovttasbargošiehtadallan čoahkkimii. Ieš Olli ii háliidan kommenteret, muhto logai son mearrida ieš goas guođđá ámmáha ja ii leat vuos vuoittahallan.

Lasit: Facebook del.icio.us Digg StumbleUpon Twitter