Váldosiidu-Hovedsiden | Ođđasat | Unnán beroštupmi

Unnán beroštupmi

Fonta sturrodat: Decrease font Enlarge font
image 15 oasseváldi álbmotčoahkkimis LES-viesus Guovdageainnus duorastateahkeda. Stuora oassi sis geat ledje boahtán, ledje suohkanpolitihkkarat.

Ikte lei álbmotčoahkkin Guovdageainnu LES-viesus, gosa suohkan lei bovden Guovdageainnu álbmoga buktit jurdagiid ođđa suohkanplánii, muhto álbmot gal čájehii unnán beroštumi.

Eai lean boahtán go 15 oasseváldi álbmotčoahkkimii, muhto dat vihttanuppelogis serve hui áŋgirit buktit jurdagiid. Lágideaddjit juhke sin golmma jovkui, ja bivde sin buktit jurdagiid sihke heajos ja buriid beliid Guovdageainnu servodagas ja birrasis. Guovdageainnu sátnejođiheaddji, Klemet Erland Hætta, lei gii rabai čoahkkima. Maŋŋel rahpama sus ledje jurdagat movt olihit stuorit oasi Guovdageainnu álbmogis ja sin oainnuid ja jurdagiid.
 – Mii eat sáhte lohkat mii leat duhtameahttumat go olbmot eai leat nu ollu olbmot boahtán dán čoahkkimii, mii fertet baicca jurddašit ahte mii eat leat doarvái buori barggu dahkan go eat nagot geasuhit olbmuid deike. Mii eat ábut skurtnjagit dainna go eai boađe olbmot, muhto gávdnat baicca vugiid movt mii olihit eanas Guovdageainnu álbmoga, lohká Hætta.

Ođđa vugiid
Hætta muitala ahte sii leat juo boazodoalloealáhusain doallan sierra čoahkkima, ja sii áigot vel doallat čoahkkimiid sihke eanandoaluin ja eará berošteddjiiguin.
 – Mun oainnán ahte eai leat boahtán Guovdageainnus nu ollu geain lea alit oahppu, sin mun goit váillahan dáppe. Orru čájeheame ahte mii fertet maid sierra čoahkkima doallat Diehtosiiddas, vai sin jurdagiid ja gelbbolašvuođa maid olihit, lohká son. Guovdageainnu Dáloniid Listtu sátnejođiheaddjievttohas ja Hætta ovttasbargoustit suohkanstivrras, Hans Isak Olsen, lei maid ovttaoaivilis Hættain ahte sii eai leat lihkostuvvan geasuhit Guovdageainnu álbmoga čoahkkimii.
 – Na mii fertet gávdnat arenaid gos olihit nu go nuoraid, go eai leat galle oasseváldi dán čoahkkimis geat leat vuollel 40-jahkásaččat. Soaitá leat nu ahte mii ferte sierra čoahkkimiid doallat sihke nuoraidskuvllas ja joatkkaskuvllas, vai oažžut fárrui nuoraid oainnu maid dán dehálaš bargui, lohká Olsen.

Álbmotčoahkkin
Dan oktavuođas go Guovdageainnu suohkan lea ráhkadeame ođđa suohkanplána (areálaoasi ođasmahttin ja vuosttaš geardde ráhkadeame servodatoasi) 2012-2025 ovddas, lea plánaprográmma biddjon almmolaš geahčadeapmái. Guovdageainnu suohkan lágidii ge álbmotčoahkkimiid sihke Mázes ja Guovdageainnus. Mázes gaskavahku ja Guovdageainnus duorastaga. Mázii ledje boahtán gaskavahku eanet olbmot go Guovdageidnui maŋŋit eahkeda, sullii 20-30 olbmo, ja sii oassálaste maid hui bures čoahkkimis.
 
Plánaprográmma gulaskuddanáigi lea golggotmánu 31. beaivi, ja plánadokumeantta sáhttá viežžat Guovdageainnu suohkana ruovttusiiddus.
  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii