Váldosiidu-Hovedsiden | Ođđasat | Eahpida boahtteáiggi

Eahpida boahtteáiggi

Fonta sturrodat: Decrease font Enlarge font
image – Dálá dilis ii leat sávzadoalus nu olu dienas ahte gánnáha menddo olu velggiid vuollái šaddat. Danne maid eahpidan galggan go váldit vuostá doarjaga Sámedikkis, go dat mearkkaša ahte oaččun velggiid Innovašuvdna Norggas, go Sámedikki doarjagiin ii leat d

Billávuotnalaš sávzaboanda, John Inge Henriksen, lea ožžon Sámedikkis doarjaga viiddidit ja ođasmahttit sávzadoalustis. Dál eahpida Henriksen galgá go váldit vuostá doarjaga, go ii dieđe duostat buot návccaid bidjat eanadollui.

– Go massán nu olu sávzzaid boraspiriide jahkásaččat, de eahpidan galggan go oba válditge vuostá doarjaga, go in dieđe man gánnáhahttin lea šat viiddidit ja ođasmahttit doalu go ná lea dilli, lohká Henriksen Ávvirii. John Inge ja su eamit, Mona Henriksen, bargaba ge sávzzaiguin Billávuonas, Porsáŋggus.

Loana ohcan
Henriksen lohká iežas hui ilus go Sámediggi áiggošii doarjut boanddaid, go boanddat leat nohkagoahtán Finnmárkkus, ja erenoamážit Porsáŋggus. Liikká lea sutnje váttis mearrádus galgá go váldit vuostá 337.000 ruvdnosaš doarjaga, go dušše Sámedikki doarjagiin ii leat doarvái.
 – Dasa lassin fertešin ohcat doarjaga Innovašuvdna Norggas, ja dieđusge vel dárbbašan loana, lohká Henriksen. Son lea rehkenastán goluid man olu mávssášii ođasmahttit ja viiddidit doalu, ja de lea lotnii Innovašuvdna Norggas rehkenaston leat 673.000 ruvnnu.

Vealgi
John Inge Henriksen ja eamit háliidivččiiga ođasmahttit návehiid, go nu mo odne doaimmaheaba sávzadoalu, de leat sudnos golbma náveha. Soai áiggošeigga ovtta albma náveha, go golbma siidda lea váttis doallat. Muhto lea stuorra lávki sudnuide huksegoahtit.
 – Dálá dilis ii leat sávzadoalus nu olu dienas ahte gánnáha menddo olu velggiid vuollái šaddat, go velggiid maid galgá nagodit máksit. Danne maid eahpidan galggan go duostat váldit vuostá doarjaga Sámedikkis, go dat mearkkaša ahte maid šattan velggolaš Innovašuvdna Norgii loana dihte, lohká Henriksen.

Politihkkárat

Henriksen moaitá dálá boraspirepolitihka, ja háliidivččii dása rievdadusaid.
– Vuosttažettiin galggašii eambbo deattu bidjat boraspirebivdui. Dál lea regulerejuvvon dainnalágiin ahte olbmot galget ieža bivdit, ja nu galgá boraspire lohku boahtit dan muddui maid ráđđehus lea mearridan, lohká Henriksen, ja oaivvilda dán boastut.
– Dat ii oba gulaše ge midjiide bivdit boraspiriid maid stáhta hálddaša, dan dihte vai lohku boađášii rievttes muddui. Dat gullá stáhtii, dadjá Henriksen, ja dáhttu politihkkáriid čorget dili.

Vuoruhit eanadolliid

Gaskavahkku almmuhii Sámediggi preassadieđáhusa mas ráđđeláhttu, Marianne Balto, juogadii ilolaš doarjjaságaid. Balto celkkii dalle ahte Sámediggái lea dehálaš doarjut dállodolliid geat háliidit áŋgiruššat eanadoalus boahtteáiggis. Dál lohká Balto Ávvirii ahte lea duođalaš ášši go eanadoalli gii lea ožžon doarjaga, ii dette dieđe váldá go vuostá dan, boraspire vahágiid geažil.
 – Lea hui duođalaš ášši go boraspiret galget boahtit ovdal ealáhusa ja olbmuid birgejumi. Lea buorre go olbmuin lea dáhttu vuoruhit eanadoalu, muhto lea stuorra vahát go leat nu olu cakkit ahte eai duostta návccaid bidjat dása, váikko vel livččiige dáhttu, lohká Balto.

Oahpis váttisvuođaide
Balto lohká iežas oahpis váttisvuođaide maid ealáhusat oidnet stuorra hástalussan beaivválaš birgejupmái, ja lohká maid iežas oppa áigge viggan ovddidit eiseválddiide man duođalaš dilli lea. Son lohká oaidnit ahte váldočuolbma lea boraspire registreren ja boraspire logu njiejaheapmi.
 – Boraspire lohku mii dál lea, lea dušše bábirlohku. Leat olu čiegus logut mat eai boađe oidnosii. Dan dihte ferte registreren čađahuvvot dárkileabbot, vai albma logut bohtet ovdan. Nubbi lea maid dat ahte oažžut dáid bábirloguid šaddat duohtan, ja nagodit jávkadit daid boraspiriid mat leat menddo olu, lohká Balto, gii ádde manne John Inge Henriksen eahpida boahtteáiggi.

Livččii birgejupmi
Balto lohká ahte eanadolliide livččii birgejupmi jus boraspire lohku maid eiseválddit leat bidjan, livččet duohta logut. Dan duođašta maiddái John Inge Henriksen.
 – Ii livččii rievtti mielde dárbu stuoridit sávzaealu, jus buot sávzzaid ealihivčče. Ja jus buot sávzzaid ealihivčče, de ii livččii dárbu buhtadusskoviid ge deavdit šat, loahpaha Henriksen gii ovdalii dáhtošii iežas elliid gávdnat heakkas guohtumis, dan sadjái go buhtadusskoviin eallit.
  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii