Dán jagáš Sáme Cup ii šatta

Nu go diibmá, de ii lágiduvvo Sáme Cup dán jagi ge. Unnán beroštupmi lea sivvan.

Diibmá galggai Sáme Cupa lágiduvvot Deanus, muhto dat ii šaddan unnán beroštumi dihte. Dán jagi ferteje lágideaddjit FC Hulløy ja Hardhaus spábbačiekčanjoavkkut dieđihit ahte ii šatta Sáme Cup dán jagi ge. Dán háve galge čiekčamat leat Narvikas.

Čuohcá máŋgasiidda
- Dán jagáš Cupii eai dieđihan go gávcci joavkku. Dat lea beare unnán. Mii livččiimet dárbbašan mihá eambbo joavkkuid, muhto dađibahábut eat ožžon eambbo dieđihemiid. Álggos leimmet mearridan ahte čiekčamat galge lágiduvvot geassemánu 25.-27. beivviid, muhto dieđihanáigi sirdui suoidnemánu 20. beaivái. Cupa livččii dasto galgan álgit odne, šuohkiha Trond Fjelldal, guhte lei okta dain máŋga jođiheddjiin.
Dušše vihtta dievdojoavkku ja golbma nissonjoavkku ledje dieđihuvvon. Njeallje joavkku gullet Lofuhtii, guokte Divttasvutnii ja guokte eará Finnmárkui.
- Dat lea váivi ahte eambbo joavkkut eai čájet beroštumi, sihke dán jagáš Cupii ja diimmá. Dát čuohcá daid dieđihuvvon joavkkuide, gehččiide ja lágideddjiide, muhto buot eanemus sámi spábbačiekčamii. Mii lágideaddjit leat maiddái olu návccaid bidjan. Ruhta maid lea mannan duššái, muhto lihkus ii leat sáhka nu olu ruđaid birra, muitala Fjelldal.

Eahpesihkar manne ii leat beroštupmi
Maŋidit dieđihanáiggi ovtta mánuin ii ábuhan. Joavkkut liikká eai čájehan beroštumi searvat Sáme Cupii. Trond Fjelldal imaštallá manne joavkkut eai beroš Sáme Cupas.
- In dieđe lea go dat sivvan ahte dán jagáš Cupa galggai lágiduvvot Narvikas. Finnmárkkus livčče olu čiekčit, muhto soaitá beare guhkki vuodjit Finnmárkkus deike. Ii Sáme Cupa sáhte lágidit dan seamma báikkis dahje guovllus juohke jagi. Dás oaidnit ge ahte lea olu máid ferte eará ládje bargat jus beroštupmi galgá stuorrut.

Meinebehtet go boahtteáiggis fas ohcat lobi lágidit Sáme Cupa?
- Dan lea váttis diehtit, vástida Trond Fjelldal.    

Lasit: del.icio.us | Digg