Vurrolagaid VUITTIIGA

Vahkkoloahpa máŋggat sihkkelgilvvut Deanus ledje erenoamáš somát báikkálaččaide, go Davvi Norgga meaštárin šadde báikkálaš searat.

Báikkálaš bivnnuhiid, Áike Selfors ja Ole Henrik Somby, strategiija ovdal gáhttavuodjima lávvardaga leai vuodjit garrasit. Ja sihkkelastojuvvui ge garrasit go moadde  kilomehteraš rieggá eai ádjánan duolmmastit go 2 minuvtta. Nuba leai gehččiide issoras miellagiddevaš oaidnit guđemuš ain leai ovddimusas go leat duolbman dán 40 minuktasaš gilvvu. Dag Broch guoimmuhii bures olbmuid mikrofuvdna geažis ja čuojahii gaskkohagaid buori musihka, mii loktii miela dán moaddelogi geahččái, geat čuvvo vuodjimiid beaivvadagas, dušše veahá biekkas.

Somby nákcii bissut njunnošis
Bealle muttos gilvvu nákcii Ole Henrik Somby rohttet okto njunnošii, nuba guođđilii dan váldojoavkku nuppelot sekunddain. Šattaige issoras miellagiddevaš oaidnit ahte nákce go Somby doalahit njunuš saji olles logi minuvttta gitta mollii. Nu son dagai ja jorai mollii Davvi Norgga meašttirin elitejoavkkus gáhtavuodjimis. Joavkoviellja, Áike Selfors, ii nákcen juksat Somby dán vuoro, vaikko son lea dovddus garrasit duohpat ovdal moala. Dán vuoro Selfors fertii duhtat nuppiin sajiin. Goalmmádin bođii Espen Amundsen, Romsa, gii dán jagi vuittiige Tour de Andorra vuodjimiid.  Eará beakkánat joavkkus lohke boastut oaidnán goabbá Sirpmá VS:s leai njunnošis, ja vuollánedje danin go gádde njunnošis leai gievrras  ”spurtár”, Áike Selfors.


Easka dál lihkostuvai
Somby ii leat lihkostuvvan dán geasi nu bures, Leavnnja Kárášjoga vuodjimis bođii nubbin, seammá maid Ruoššas Apatitys Barents Meašttirgilvvuin, gos ges joavkoviellja Selfors faskii vuoittu. Dál lea ieš duđavaš go dál birgii ná bures.
–Dál mus leai kontrolla olles áigge, iige gánnet daid smávva vuodjimiid vuoitit, leaikkastallá dánjagáš DNM elitevuoiti, gáhtavuodjimis. Eará beakkálmasat seamma joavkkus ledje dan jagáš Tour de Andorra vuoiti, Espen Amundsen, Romsa. Geahččit ja gilvvuid lágideaddjit dušše bánccardedje ilus go ruovttujoavku vuittii duppalit.
–Issoras somá, huiká Arild Måsø, Sirpmá VS:s ja giitá gánddaid buori ”showas”.   

Tempovuodjima eai birgen báikkálaččat
Lávvardaga iđida lágiduvvui tempovuodjin Sieiddás vulos guvlui, masa serve oktiibuot 110 sihkkelasti  sihke Ruoššas ja Davvi-Norggas iešguđetge joavkkuin. Elitejoavkkus 20 kilomehteris eai birgehallan báikkálaš searat, go vuoittu faskii Espen Amundsen, Romsa, nubbin Kjell Harald Horn, Rye sportasearvvis, goalmmádin Jacob Meland, Sandnessjøenis. Somby bođii njealjádin, minuvtta maŋŋá vuoiti. Son dáiddii seastán searaid gáhttavuodjimiidda.  

Selfors ges vuittii guhkesmátkki
Sotnabeaivve ledje guhkesmátkevuodjimat,mas elitejoavku duolmmai golmma geardde ovdán ruoktot Deanu Šalddis Vuonnabahtii, oktiibuot 105 kilomehtera. Vuosttažin mollii deašahii vuollel 23-jahkásaš luohká vuoddji, August Jensen Budeajjus. Vaikko son leai guhká njunnožis, de juvssahalai moallasárgás, ja sentte maŋábealde girddihit Sirpmá Valáštallansearvvi, Áike Selfors mollii. Vaikko son Vuonnabađas ravggai, de dát ii hehtten su vuoitimis iežas joavkkus. Selfors giitá joavkovieljaid duvdinveahkis, go ii lean jáhkkit iežas vuoitit. Dás ges Somby bođii iežas luohkás njealjádin. Dát 3 diibmosaš vuodjin leai čearggus, go diimmu gaskkaid jovde vuoddjit jorgalanbáikái. Sirbmálaš vuoddjit ledje soahpan ovttas geassit Selforssa lahka moala, go son lea buoremus moallasárgá ovdal.
–In jáhkkán nákcet liikká ná bures, go leai lossa ceakko geaidnu badjel Sáttovári, dadjá Davvi Norgga meašttir guhkesmátkevuodjimis. Davvi Norggameašttirgilvvut, Barents Grand Prix ja Barents cup-gilvvuide dán vahkkoloahpa Deanus oassálaste oktiibuot 120 oasseváldi. Suoma vuoddjit eai lean boahtán Barentsgilvvuide, go Suomas lágiduvvui seammás Suoma Meašttirgilvvut.

Lasit: del.icio.us | Digg