Duostilis nuorat ođđa ofelaččat: Áigot mátkkoštit, čilget ja juoigat

Golbma iešguđetgelágan sámi guovllut ovddastuvvojit go dán jagáš ofelaččat galget mátkkoštit birra Norgga ja muitalit sápmelaččaid birra.

Lávvardaga álmmuhedje ođđa ofelaččaid Riddu Riđđus, ja dalle čielggai ahte Anne Margaretha Kuhmunen Oskal (21), Anna Cicilie Somby (21) ja Ánde Trosten (20) galget johtit skuvllas skuvlii birra Norgga boahtte jagi. Ofelaš-ortnet galgá ovddastit buot sámi guovlluid, ja dán jagi leat nuorat Sáláhis, Snoasas ja Deanus eret.

- Eat bala masge
Liikká go nuorat leat jurddašan olu boahtte jagi birra, de eai oru ballamin daid stuorra hástalusain maid bohtet deaivat mátkkis.
 – Eat bala masge, sii čaibmet.
Sin duogáš galgá leat veahkkin go deaivvadit ohppiiguin, ja golbma sámenuorat sáhttet ge geavahit dan go galget muitalit sápmelaččaid birra. Anne Margarethas lea duogáš boazodoalloskuvllas ja lea leamaš boazodoallooahpahalli, Anna Cicilie bearaš gullá sihke davvi- ja máttasámi kultuvrii ja Ánde máhttá olu sihke davvisámi ja Norgga kultuvrra birra.
 – Mun vásihan máttasámi kultuvrra dego «underdog´a», ja boađan várra deattuhit eambbo dan oasi go davvisámi kultuvrra, lohká Anna Cicilie, Snoasas eret.

Illudit mátkkoštit
Nuorat illudit álgit mátkki, ja sis leat máŋga vuordámušat dán jahkái.
 – Šaddá ođđa hástalus, dát ii sulastahtte makkárge eará barggu, lohká Ánde Trosten.
Nieiddaguovttos leaba ovttamielalačča dása.
 – Jáhkkan dát šaddá erenoamáš jahki, ja illudan mátkkoštit olles Norggas. Sávan ahte deaivat máŋga vuollis nuoraid, muitala Anna Cicilie Somby.

Háliidit olahit nuoraide
Muhtun váttisvuođat gal liikká jáhkket ahte bohtet deaivat.
 – Stuorámus váttisvuohta šaddá olahit nuoraide, ja ahte sii duođaid áddejit maid mii muitalat, lohká Anna Cicilie viidásat.
Ánde fas deattuha mátkkoštanoasi.
 – Fertet vántaluvvát olu mátkkošteapmái. Fertet várra juohke láhkai mátkkoštit; biillain, fatnasiin, bussiin, čilge son.

Unnán oahpu
Juohkehaš nuorain lea vásihan man unnán eará nuorat Norggas dihtet sápmelaččaid birra, ovdal go leat oba álgán diehtojuohkinbarggu.
 – Lean orrun Guovdageainnus ja dáža báikkis Sáláhis. Dieđán man stuorra erohusat leat ja man unnán olbmot dihtet min birra, čilge Anne Margaretha.
 – Máttasápmelaččaid birra leat erenoamážit unnán oahpu, ja áiggun geahččalit dán buoridit, fas lohká Anna Cicilie.
Maiddái Ánde lea vásihan dan seamma go nieiddaguovttos.
 – Go lean mátkkoštan máddin, de olbmot jerret olu gažaldagaid sápmelaččaid birra. Dál šaddá buorre oahppat mo albma láhkai sáhtán čilget dan.
Ovdal go golbmasat vulget
mátkái, galget sii čađahit kurssa Sámi Allaskuvllas gos sii ohppet gaskkusteami sámi kultuvrra birra.

Galget juoigat
Ovddit ofelaččain leat nuorat gullan ahte soitet fertet juoiggastit klássalanjain.
 – Fertejin juoigat maid go ledjen jearahallamis ofelaš-bargui, nu ahte jáhkán dat manná bures. Livččen ballat eambbo jus fertejin njealja skihpáriidda juoigat dáppe davvin, go 40 amas ohppiide máddin, loahpaha Ánde.

Lasit: del.icio.us | Digg