Dulvi márkanis

Čáhccás arveoavttit maŋimuš beivviid lea dulvadan Kárášjoga guovddášmárkana ja čáhci lea golgan olbmuid kealláriidda. Kárášjoga dollačáskadanhoavda, Alf Isaksen, gii lea jođihan gurrenbarggu, árvala deađvasan dahje dáhppon čáhcebohcci sivvan dulvái.

Kárášjoga dollačáskadeddjiin leamaš maŋimuš beivviid olu bargu, ii dola čáskadit, muhto jávkadahttit dan stuorra jávrri mii lea ihttán stuorra biilaguođđinšiljus guovdu márkana, go dat lea dulvadan Čálliidlágádusa keallára. Njamistuvvon čázi leat sii cirgguhan johkii.
 – Golbma dollačáskadanbiila ja guokte biila gieldda olgobargiide lea mis dás barggus. Mis dulvagođii ČálliidLágádusa keallir gos skuvlagirjjit leat, ja šattai heahti ja hoahppu dan gurret, lohká dollačáskadanhoavda, Alf Isaksen.
 Stuorra biilaguođđinšillju olgobeale buvddaid lea ihttán jávri ja Isaksen ballá čáhcebohcci mii galgá juhkat čázi lea deađvasan dahje dahppon man nu láhkai.

Čáhccás arveoavttit
Sivva dulvii árvala Isaksen leat sihke čáhccás arveoavttit ja asfalterejuvvon guovddáš go asfálta ja geđgejuvvon šilljoravddat hehttejit čázi golgamis eatnamii. Son muitala sii gurrejedje visot duorastaga, muhto go finastii geahččamin mo dilli lea, de lei fas márkan dulvan. Nu šadde sii ođđasit gurregoahtá ja bearjadaga gaskabeaivve áigge rehkenasttii Isaksen sin geargat bargguin.
 – Čáhcebohcci ii leat velá rahpasan. Go buot lea gurrejuvvon, de lea mis plána filmmat dan bohcci siskkobealde kamerain. geahččan dihtii gokko lea billašuvvan go ii juga čázi, lohká Isaksen ja gállila bargui.

Girjjit njuoskan
ČálliidLágádusa jođiheaddji, John Trygve Solbakk, muitala arvečáhci lea golgan guktii dán gease sin 60 m2 sturrosaš keallárii. Vuosttaš geardde gurrejedje ieža keallára. Stuorámus vahát lei go eai lean geargan bajidit buot girjekássaid girjevuorkká hilduide nu ahte olu girjjit njuske.
 – Stuoriduvvon oassi dán visttis lea huksejuvvon nu mo galgá, dadjá Solbakk ja jearrá maid gielda áigu dahkat čáhcebohcciin mat eai leat doarvái stuorra juhkat arvečázi.

Jágat-beaivái bistet dát dálkkit
Kárášjohkalaš, Bieska Niillas Ánde, muitala moadde vahku dás ovdalis lei maid biilaguođđinšilju guovdu márkana šaddan jávrin maŋŋá garra arvvi ja čuorpmasteami. Arvvi ja čoaska dálkki jáhkká bistit gitta Jágátbeaivái, borgemánu 24 beaivái, jus dološ beatnatbeaivvi mearkkat doalašit deaivása, go ovddit beaivve lei vuosttaš beatnatbeaivi, mii lea dološ mearkabeaivi.

Lasit: del.icio.us | Digg