DUOGUŠTAN BISSUID

Kárášjoga politiijat leat duoguštan bissuid, mat eai lean vearjoskábes nu mot suoidnemánu 1. beaivve ođđa láhka gáibida.

Guokte vahku lea vássán dan rájes go politiijat Kárášjogas duoguštedje golbma bissu Kárášjogas. Politiijat ledje gohččon boahtit go ovtta priváhta viesus gos lei bearášriidu.
  – Mii bođiimet dohko, eat ge gávdnan dan nuppi olbmo gean mii ozaimet. Ovtta lanjas gávnnaimet baicce golbma bissu mat eai lean vearjoskábes. Mii duogušteimmet daid bissuid, dadjá politiijabálvá Kjell Magne Grønnli, Kárášjoga leansmánnikantuvrras.
 Ovdal lei nu ahte jos ledje eambbo go njeallje bissu, de galggai vearjoskábe. Suoidnemánu 1. beaivve bođii ođđa láhka, buot bissut galget leat lássejuvvon duhkehuvvon vearjoskábii, vaikko lea dušše okta bissu.

Varalaš
Okta vearjoskábe máksá sullii 3000 ruvnno, muhto Grønnli doaivu ahte máŋggas eai leat fuobmán ahte galgá vearjoskábe.
 – Dal šaddá nu ahte ferte duođaštusa vearjoskábes čájehit ovdal oačču guoddinlobi bissuide, dadjá Grønnli. Dat ođđa láhka bođii maŋŋel go nu olu bissut ledje jávkan ja suoláduvvon.
  – Dat lea varalaš jos bissu boahtá dakkár gieđaide gosa ii gula, dat lea varalaš buohkaide, dadjá Grønnli.

Riidalanáššiin
gávdne
Politiijat eai leat gal vuos leamaš viesuin geahččame leat go bissut vearjoskábiin.
  – Mun dieđan Guovdageainnus leat ovdal dahkan dan, muhto dan maŋemuš áigge gal in dieđe. Mii gal eat leamaš, dadjá Grønnli. Son muitala ahte sii dávjá gávdnet bissuid go riidalanáššin šaddet vuolgit priváhtaviesuide.
  – Dakkár áššiin šaddat miehtá viesu ohcat olbmuid, de lávejit bissut gávdnot, dadjá Grønnli.

Iskáme áššiid
Dal lea politiijat eará áššiid maid iskame. Jos galgá leat bissuguoddinlohpi, de ferte jurddašit veaháš.
  – Mii leat dal iskáme moadde ášši. Jos galgá leat bissuguoddinlohpi, de ii ábut leat nu juhkki, iige ábut doarrut ja eará kriminála diŋggaid bargat. Mis leat dal máŋga dakkáraš ášši, dadjá Grønnli.
Go politiijat gávdnet bissuid mat eai leat vearjoskábes, de váldet daid leansmánnikantuvrii.
  – Mii vurket daid dasa go bissueaiggát lea oasttán vearjoskábe, ja máksán sáhku, dadjá Grønnli.

Grønnli ii diehtán ollu sáhku bissoeaiggát oaččui. Ávvir ii ožžon ságáide ovttage Nuorta-Finnmárkku politiijajuristtaid ovdal aviisa manai deaddileapmái.

Lasit: del.icio.us | Digg