Isak Thomas Triumf, Guovdageainnus, lea 50 jagi bivdán rievssahiid, muhto dál leat nu unnán rievssahat ahte son oaivvilda mii fertet bissehit rievssatbivddu ovdal lea beare maŋŋit.

Rievssatbivdu lea guhká geasuhan olu bivdiid Finnmárkui. Daid maŋemus jagiid leat beare olu rievssahat báhččon, ja dál oaivvilda Isak Thomas Triumf (64) ahte rievssahiid ferte ráfáiduhttit unnimusat ovtta jahkái vai rievssatlohku stuorru. Son lea golbmii sádden reivve Finnmárkkuopmodahkii ja evttohan ráfáiduhttit rievssahiid Finnmárkkus.
 – Árvalin maid ahte sii sáhttet Guovdageainnu geavahit geahččalansuohkanin, muhto in jáhke sii dáhket dan go sii dinejit ruđa rievssatbivdduin. Gal dat livččii mihá suohttasit bivdit jus livčče eambbo rievssahat. Jáhkán dat gánnáha ráfáiduhttit rievssahiid juobe ovtta jahkái ge, dadjá Triumf.

Heaitán bivdimis
Viidásit son muitala ahte lea leamašan čoahkkimiin gos leat digaštallan rievssatlogu.   
 – Dieđán leat olu eará bivdit geat oaivvildit dan seamma go mun. Mii bivdit gal sihkkarit birget ovtta dahje guokte jagi rievssatbivddu haga, muhto Finnmárkkuopmodat dat mearrida galgá go ráfáiduhttit, dadjá Triumf.  
 Son sávvá ahte FeFo sáhttá guldalit bivdiid geat leat guhká bivdán ja dasto dihtet goas galggašii ráfáiduhttit. Ieš lea Triumf bivdán dan rájes go lei 15 jagi, muhto ii leat daid guokte maŋemus jagiid bivdán. Dálvet láve gielaiguin bivdit, muhto lea dan maid heaittihan.
 – Mun in áiggo dán čavčča ja dálvvi ge bivdit, muhto in sáhte okto gádjut rievssatlogu, šuohkiha son.   
Ráfáiduhttán Suomas
– Mun lean maiddái gulaskuddan olbmuiguin Suomas. Doppe leat maid unnán rievssahat, muhto lean gullan ahte sii leat álgán ráfáiduhttit rievssahiid. Jus mis nohket rievssahat Finnmárkkus, de sáhttá mannat oba guhkes áigi ovdal go rievssatlohku fas stuorru, čilge Isak Thomas Triumf.
Rievssatbivdu álgá čakčamánu 10. beaivve.  

– Eat sáhte ráfáiduhttit    

FeFo lea ovttaoaivilis ahte leat unnán rievssahat, muhto eai sáhte oalát ráfáiduhttit vuos.  

- Juo, mii leat ovttaoaivilis ahte Finnmárkkus leat unnán rievssahat, lohká FeFo meahccehoavda, Rolf Kollstrøm, gii seammás mieđiha ahte ii leat lohkán Isak Thomas Triumfa reivve, muhto lea gullán dan birra.

Našunála doaimma
–Vaikko mii diehtit ahte rievssatlohku Finnmárkkus lea njiedjan, de eat sáhtte dušše bissehit rievssatbivddu. Dán čavčča loahpahuvvo okta golbmajahkásaš našunála prošeakta gos dutkit leat lohkan rievssahiid ja iskkan makkár guovlluin leat hui unnán rievssahat. Mii oažžut bohtosiid ovdal go rievssatbivdu álgá. Bohtosat sáhttet muitalit galle rievssaha galggašii leat lohpi báhčit dán čavčča, muhto maiddái gos ferte boahtteáiggis ráfáiduhttit rievssahiid, čilge Kollstrøm.

Eambbo bivdit  
– Logut čájehit ahte daid maŋemus rievssatbivdduin leat leamašan viđa geardde eambbo bivdit go 2000:s. Jus mis leat nie olu bivdit Finnmárkkus, de dieđusge ferte rievssatlohku lassánit, loahpa FeFo meahccehoavda, Rolf Kollstrøm.

 

Lasit: del.icio.us | Digg