Viimmat máilmmegilvvohallamii

Dál lea viimmat čielggan ahte 21 jahkásaš heaibu, Maja Erlandsen, Deanus eret, lea okta guovtti nieiddain Norggas gii beassá oassálastit máilmmimeašttirvuođagilvvohallamis čakčat.

Čakčamánu álggus deaivvadit máilmme buoremus nieidaheaibot Ruoššas, ja dál lea čielgan ahte Deanu heaibu, Maja Erlandsen, lea sin searvvas. Riikajoavkku hárjeheaddji, Gabbe Kantor lea válljen Erlandsena ja eará nieidda, Gudrun Høle, Kristiansundas, ovddastit Norgga.
 Deanu IF:a váldohárjeheaddji, Frode Gundersen, lea duhtavaš: – Kantor ii leat dárbbašan čilget manne lea válljen Erlandsena sáddet, son lei čielga kandidáhta. Son lea fasken medáljjaid stuorra meašttirvuođagilvvuin, ja lea bargan buoremus bárggu nieiddaid gaskkas. Mii leat hui duđavačča go háliida ovddastit Deanu IF:a máilmmegilvvohallamis.

– Stuorra gutni
Heaibu ieš lea maid hui lihkolaš go beassá vuolgit Ruššii.
 – Munnje lei somá gullat ahte beasan oassálastit máilmmimeašttirvuođagilvvohallamis. Lea maiddái gutni ja duođaštus dan barggu ovddas maid lean bargan, Maja Erlandsen lohká.

Buori vejolašvuođat
Máilmmimeašttirvuođagilvu heaibumis lea stuorámus gilvu maŋŋá Olympiija gilvvuid, ja hárjeheaddji Gundersen jáhkká ahte Erlandsenis sáhttet leat buori vejolašvuođat fasket medáljja gilvvus.
 – Buori beivviin lea sus leamaš buori vejolašvuođat, muhto su beaivválaš orrunhápmi mearrida mo manná. Gundersenis leat liikká čielga doaivva man bures galggašii mannat.
 – Mis lea doaivva ahte Maja nákce šaddat okta dain logi buoremusain.

Niegada medáljja birra
Erlandsenis leat fas vel alit vuordámušat iežas olahusaide.
 – Niehku lea dieđusge fasket medáljja, muhto lean maid duhtavaš jus beasan viđa buoremusa searvái.
Su ahki lea maid ágga olahusaid ektui.
 – Lean dušše 21 jagi boaris, ja sii geat leat vuoitán nie nuorran, leat erenoamáš taleanttat. Dábálaččat ii vuoitte máilmmimeašttirgilvvohallama ovdal lea gaskal 24-30 jagi, valášteaddji čilge.


Canadas hárjehallá
Justa dál illuda Erlandsen boahtit ruoktot Detnui. Maŋŋá go lea váhku beassan vuoiŋŋastit ruovttuguovllus, vuolgá heaibu Canadai hárjehallat máilmmegilvvohallamiidda.
 – Lean doppe hárjehallamin buoremus heaibbuiguin máilmmis, earret eará máilmmimeašttirin mu dásis. Jáhkán šaddá hui garas, nu ahte lea buorre ahte beasan vuoiŋŋastit Deanus váhku vuosttažettiin, Erlandsen lohká.

Lasit: del.icio.us | Digg