Váldosiidu-Hovedsiden | Ođđasat | Vuittiiga Luossagonagasgilvvu STUORRA LUOSAIN

Vuittiiga Luossagonagasgilvvu STUORRA LUOSAIN

Fonta sturrodat: Decrease font Enlarge font
image Ohcejohkalaččat Jouni Kuvaja ja Pia Länsman leaba hui movtta go šattaiga jagi 2010 luossagonagasat.

Jouni Kuvaja ja Pia Länsman vuittiiga Ohcejoga Luossagonagasgilvvu 11,622 kg luosain. Gilvu dollojuvvui lávvardaga Suomas, Ohcejogas.

Ohcejoga Luossariemut ja Luossagonagasgilvu lágiduvvojedje jo 30. geardde Ohcejogas, lahka Sámi šalddi. Dán jagi luossagonagasat Jouni Kuvaja ja Pia Länsman gottiiga iežaska vuoitoluosa Čearretnuorri vulogeahčen, gasku Deanu. Jouni Kuvaja lei válljen gilvvohallamii fiskes ruoná muorraguoli, mas ledje čáhppes doares sárgát. Dasa vuoitu luossa dohppii.
— Ledjen geahččamin arvebalvvaid go Jouni dajai, ahte munnuide lea dohppen guolli. Mun rullejin eará stákkuid eret ja álgen váibadit luosa, masa manai sullii guoktelogi minuhtta áigi. Jouni dat ruohkastii loahpas guoli fatnasii, muitala Pia Länsman.
    — Go bođiimet vihkket guoli, munnuide álggii čielgat, ahte dát munno lagabui 12 kilo luossa lea gilvvu vuoitoguolli, dadjaba Kuvaja ja Länsman guovttos.

Vuoitu atnun
Ohcejoga Luossagonagasgilvvus lei bálkkašupmin Deanu fanas ja guokte mohtora, stuorit ja unnit. Kuvaja ja Länsman válljiiga vuoitun stuorit fanasmohtora. Gilvvu maŋŋá vuoiti guovttos  muitaleigga, ahte sudnos bieđganedje guokte mohtora mannán vahkus ja dan dihte bálkkašupmi bođii sudnuide duođai atnun.
— Dát gilvu gal manai buorebut go maid moai leimme vuordán. Oaččuime ođđa mohtora bieđganan sadjái. Moai letne plánen oassálastit boahtte čavčča vuosttas háve fanaskursii, mii ordnejuvvo Ohcejogas. Moai áigo ráhkadit doppe iežame Deanu fatnasa. Dan dihte lei maiddái heivvolaš válljet mohtora bálkkašupmin, čilgeba Jouni Kuvaja ja Pia Länsman.
    Nubbin boahttit  Matti Röntynen ja Seppo Hoffren válljiiga Deanu fatnasa. Eero Ahlgren ja Kimmo Kemppainen  leigga goalmmádin ja sudnuide bázii vuoitun unnit mohtor.

Gelddolaš
Dát lei vuitiide nubbi geardi go soai oassálasttiiga ovttas Luossagonagasgilvui. Mannan jagi soai gilvaleigga ovttas vuosttas háve. Pia Länsman lea oassálastán gilvui buohkanassii guovtti geardde, Jouni Kuvaja fas golbma dahje njeallje.
— In leat ovdal vuoitán luossagonagasgilvvu ja dát munno vuoitoguolli lea vuosttas albma luossa, man lean ieš váibadan. Jouni gal attii munnje buriid rávvagiid, ii ge son dárbbašan oba čeargut munnje go váibadin luosa, muitala Länsman mojunjálmmiin ja lasiha, ahte dát vásáhus lei gelddolaš.
    Pia Länsman lohká, ahte son guolásta eanet Geavus ja Ohcejogas, muhto ii olus Deanus. Son vulggii dán gease vuosttas háve Deanu ala Luossagonagasgilvvuin. Jouni Kuvaja fas sugaha ollu olbmuid Deanus.

Mánáide maid gilvu
Ohcejoga Luossariemuin lei maid mánáide iežas dolgevuokkain oaggungilvu. Vuoiti Arttu Karjalainen gottii vihtta guoli. Janne Mustaniemi gottii fas njeallje guoli ja bođii nubbin. Dán gease guollegilvui oassálaste eanet mánát go ovddit jagiin. Vuoitun ledje dolgevuoggaoaggunbiergasat. Buot gilvaleaddjit bálkkašuvvojedje.
  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii