Váldosiidu-Hovedsiden | Ođđasat | – Allet vuolgge sirkusii!

– Allet vuolgge sirkusii!

Fonta sturrodat: Decrease font Enlarge font
image Kárášjoga nuorra sirkus vuosttaldeaddjit. Gurut ravddas: Anne Louise Næss Gaup, Malin Balto Haugli, Karina Kåven Kaaby, Stina Marie Rollstad, Silje Borg Fagernes, Morten Søgård, Julie Sofie Nordsletta Borgan, Linda Anette Turi Krokmo, Julie Biti Teigmo, U

Kárášjoga nuorat gohččot dál olbmuid garvit sirkusa maŋŋá go neahtas oidnui filbma sirkuselliid dili birra. – Allet doarjjo sirkuselliid biinnideami, gohččot nuorat.

Neahtas lea oidnon filbma maid NOAH elliidrivttiid searvi lea ráhkadan sirkuselliid dili birra. Doppe boahtá earret eará ovdan go sirkuseallit biinniduvvojit sihke illástemiin ja gáržžes áiddiid ja biillaid siste. Dán filmma leat Kárášjoga nuorat oaidnán, eaige šat vuolgge sirkusii.
 – Mun in guođe šat ruhtalána sirkusii, inge ávžžut earáidge divrasit máksit sirkusii vuolgit, go nu han olbmot dorjot sirkuselliid biinnideami, dadjá Ánne Louise Næss Gaup Ávvirii.

Heajos dikšu
Dan ahte sirkuselliid dikšu lea heittot, eai eahpit Kárášjoga nuorat maŋŋá go leat oaidnán sirkusa birra filmmas.
 – Mu mielas lea hui ártet go olbmot, geat beaivválaččat barget elliiguin, eai máhte daid buorebut dikšut, dadjá Julie Sofie Nordsletta Borgan. Son lea  maiddái okta sis gii lea searvan NOAH vuolláičállinkampánjii, oččodeames elliid eret sirkusis.
 – Sirkusa elliid hága livččii olu buoret, dadjá son.

Vuosteháhku
Vuostehágu sirkusii leat nuorat čájehan earret eará dainna go dál ovddidit ášši aviissas, ja go iežaset neahttasiidduin čállet dan birra, ja ávžžuhit olbmuid garvit sirkusa. Nuoraid mielas lea dát buorre vuohki čájehit ahte eai doarjjo sirkusa, eaige loga áigut demonstreret go sirkus boahtá Kárášjohkii geassemánu 5. beaivvi.
 – Min mielas ii leat vuogas sirkusa olggobeallái mannat demonstreret, go doppe leat earret eará mánát maidda ferte váldit deastta, muhto doarvái demonstrašuvdna lea juo go nu ollugat eai áiggo šat sirkusii vuolgit, lohká Julie Biti Teigmo.

Buohtastahttin
Vaikko Sámis ge dápmet elliid, nu go ovdamearkka dihte bohccuid, de ii leat nuoraid mielas heivvolaš sirkusa buohtastahttit dáinna.
 – Ii oba sáhtege buohtastahttit boazodoalu ja sirkusa, go mii eat huškko iežamet elliid, eatge daid doalat gárddiid siste birra jagi, juohke beaivvi, dadjaba Ánne Louise ja Julie Sofie. Soai háliideaba maiddái muittuhastit olbmuid ahte eanaš eallit mat čájehuvvojit sirkusis, eai gula Norgii.
Filmma geahččat
Sirkusáigi lea Norggas dál álgán, ja fargga boahtáge sirkus Merano Kárášjohkii. Dál háliidit nuorat ahte olbmot váldet dili geahčestit filmma maid NOAH lea ráhkadan, ovdal go mearridit áigot go sirkusii vuolgit dahje eai.
 – Dáhttut olbmuid geahččat filmma sirkuselliid birra, ovdal go bures smihttet háliidit go duođaid šat sirkusii vuolgit. Mii ávžžuhat maiddái mánnáolbmuid oahpahit mánáide ahte elliid doalahit sirkusis lea vearrut, loahpahit Kárášjoga nuorat.

Filbma maid NOAH lea ráhkadan ja mii bistá badjelaš guoktelogi minuhta, sáhttá oaidnit dás: http://vimeo.com/11214114

  • email E-poasta du skihpárii
  • print Čálihanversudvna
  • Plain text Dábálaš teaksta
Merkejuvvon ná:
Eai leat mearkkat dán artihkkalii