avvir.no: Váhnen suorganan Rivguid oainnuid dihte Váhnen suorganan Rivguid oainnuid dihte ================================================================================ Ann Helen Guttorm Johansen annhelen@avvir.no on 2011-12-10 04:00:00 Golmma máná váhnen, Ann-Kristine Bongo, lea suorganan go rivgut ollesolbmo agis eai udno su mánáide sámegiel mánáid-tv. Kvinneguiden.no nammasaš neahttasiiddus, mii lea okta Norgga stuorámus nissonfierpmádagain, lea sierra digaštallanlávdi, ja doppe leage sámegiel mánáid-tv maid šaddan fáddán. 14 siidosaš digaštallamis lea eanaš sáhka dan birra go sámi mánáide ii galggaše sierra mánáid-tv sámegillii, ja dát suorggaha váhnema, Ann-Kristine Bongo, Guovdageainnu suohkanis eret.  – Munnje lea hui ahkit oaidnit go rávisolbmot eai udno mu mánáide sámegiel mánáid-tv. Erenoamážit dan dihte go mánát nu illudit dan geahččat danne go das sii ipmirdit mii daddjo, lohká Bongo Ávvirii. Nissonat celket Earret eará celket nissonat ná, jorgaluvvon dárogielas sámegillii: «... manne sidjiide galget sierra tv-prográmmat go leat oassin Norggas? Lean birui dohko dolkan sierravuoigatvuođa addimis.» «... Leat olu minoritehtat Norggas mat leat stuorábut go sápmelaččat. Galgá go sidjiide maid diibmobeale sátta riikaviidosaš kanálas?» «... Sámi mánáid-tv lea hui doavkkes ja čuorbbesláhkái ráhkaduvvon. Heajuriebut, sámi mánát.» Váivi Bongo atná váivin mo čállo sámi mánáid tv-fálaldaga birra.  – Mun oainnán ahte sámi mánáid-tv:i lea stuorra dárbu, go oainnán man olu movtta ja beroštumi dat boktá mánáin. Tv han lea šaddan nu lunddolažžan dán áigge, ja de lea dehálaš ahte mii ge čuovvut servodatovdáneami, dadjá Bongo. Son maid lohká erenoamáš balddihahttin dán digaštallama go ii ovttasge leat bággu geahččat sámegiel sáddagiid.  – Tv-kanálat gávdnojit nu olu. Ii leat dárbu geahččat sámi mánáid-tv dan diibmobeale go dat bistá, dadjá Bongo. Njuolggadusat Kvinneguiden nammasaš neahttasiiddus leat sierra njuolggadusat mat gusket digaštallamiidda, ja daid oaivvilda Bongo leat čielgasit rihkkojuvvon. Doppe čuožžu ge earret eará ahte «…Kvinneguiden fierpmádaga ii oaččo geavahit bealálaš oaivilváikkuheapmái, ovdamearkka dihte njuolggut duolbmat álbmotjoavkkuid, oskku, eallinoainnu, iešvuođa dahje náli. Áššejođiheaddjit doalahit Ráŋggáštuslága § 135a…».  – Dán dihte oainnán mun ahte nissonfierpmádat ii lean galgat diktit dán digaštallama ná leavvat, ja njuolggadusaid mielde galggašii sihkkut digaštallama, lohká Bongo. Vearrámussan oaidná son goitge go leat nissonolbmot ollesolbmo agis geat digaštallet.  – In ipmir ahte rávis olbmot gillejit čállit dákkáriid gos ollu nissonat servet digaštallamiidda. Lea maid oalle vearrái go seaguhit mánáid digaštallamii, geat eai beasa iežaset bealuštit, dadjá vuollánan Bongo. NRK Sápmi NRK Sápmi buvttada sámi mánáid-tv, ja Ávvir leage bivdán NRK Sámi váldodoaimmaheaddji, Nils Johan Heatta, geahččat debáhta mii nissonfierpmádagas lea. Dása vástidage Heatta ná:  – Mun lean dál geahččan dien debáhta ja gávnnahan ahte mun in oba gillege kommenteret digaštallama mas olbmot eai duostta eai namaideaset ge almmuhit. Dasto leat vuolggaheaddji guottut ja máhtolašvuohta dan dásis ahte ii leat áhpu ii coggat ge jierpmi dahje mielaid su oaivái, dadjá Heatta su birra gii lea vuolggahan digaštallama. Eai šálloš Edda Media eaiggáduššá Kvinneguiden, ja doaimmaheaddji Edda Mediaid našunála neahttabáikkiin, Lars Lager Espevale, ii šálloš gal dán digaštallama sisdoalu.  – Digaštallamat muddejuvvojit njuolggadusaid mielde. Váikko vel son gii vuolggaha digaštallama sáhttá provoseret sin geat atnet árvvus tv-prográmmaid, de dát lea siskkobeale rájáid. Ferte leat lohpi divvut dákkár gažaldaga, ja ferte leat lohpi digaštallat dán. Gaskkohagaid digaštallamis oaidná gal eaŋkil cealkámušaid mat spiehkastit, muhto ollislaččat árvvoštallon de lea digaštallan liikká duođalaš, diehtojuohkki ja iešmuddejeaddji, dadjá Lars Lager Espevale.