avvir.no: Keskitalo buohccin dieđihuvvon

Keskitalo buohccin dieđihuvvon
================================================================================
Silje Malene Varsi silje@avvir.no on 11 March, 2010 05:14:00
 
Gunn-Britt Retter lea dál NSR sadjásaš organisatuvrralaš jođiheaddji, ja
son ii loga vel diehtit man juhká Keskitalo lea buohccin dieđihuvvon.
 – Ii leat biddjon áigemearri man guhká son lea dieđihuvvon buohccin,
dat sáhttá leat vahkku, guokte vahkku dahje ovcci mánu.  Dat lea dieđusge mo
su dálkkodemiin manná, dadjá Retter.
Ii heahti
Retter muitala sin NSR:s mearridan dieđihit ahte Keskitalo lea buohccin
dieđihuvvon vai olbmot eai álgge imaštit. Son ii hálit čiekŋudit lagabut
makkár dávddas lea sáhka, ja lohká ahte lea Keskitalo duohken almmuhit
iežas diagnosa.
 – Jus ieš háliida almmuhit diagnosa, de lea su duohken. Mii vuordit ahte
son dearvvašmuvvá, muhto ii leat gal heahti, lohká son.
 Gunn-Britt Retter muitala ahte NSR lea válljen almmuhit Keskitalo
buozanvuođa vai olbmot eai imaštišgoađe manne eai gávnna su ságaide. Aili
Keskitalo lea ieš maid dáhkidan NSR:i ahte leat mihkke heđiid go lea
buohcame.
Sadjásaččat
Aili Keskitalo lea ge sihke NSR jođiheaddji ja parlamentáralaš jođiheaddji.
Danne lea šaddán NSR dál juohkit dan ámmáha guovtti olbmui.
 – Mun doaimman NSR organisatuvrralaš jođiheaddjin ja Geir Tommy Pedersen
doaibmá ges NSR sámediggejoavkku parlamentáralaš jođiheaddjin dan botta go
Aili lea dieđihuvvon buohccin, čilge Retter.
Virkui
Gunn-Britt Retter sávvá dal ahte sin njunuš politihkar máhccá dearvvašin
fas politihkalaš doaimmaide.
 – Aili han lea hui virkui muđui, son ii láve viššat lea nu guhká
virgelobis ge. Danne eat sáhte mii bidjat áigemeari man guhká son lea eret
virggis, go lea nu eahpesihkar goas boahtá fas bargui, dadjá Retter.