avvir.no: Návda ahte biergojohtu buorrána Návda ahte biergojohtu buorrána ================================================================================ Carl-Gøran Larsson carl@avvir.no on 09 October, 2009 02:59:50 Even Nordahl Biergodiehtokantuvrras lohká ahte bohccobiergu ii leat vuos joavdan buvddaide, ja dat sáhttá dagahit ahte johtu ii leat vuos nu buorre, muhto son ii sáhte duođaštit ahte lea heajos biergojohtu.  – Bohccobiergu lea áigodatgálvu, ja vuovdin boahtá oalle sihkkarit johtui farga, ii ábut jierásnuvvat ovdagihtii, lohká Nordahl. Man bures vuovdin manná ii sáhte diehtit ovdal juovllaide.  – Go márkanastin boahtá albmaláhkái johtui de láve johtu maid buorránit, muitala son. Geahččat dili Odne lea Bohccobierggu jođu oktavuođalávdegottis (KRO) čoahkkin Álttás. Medias lea beaggán guhkit áiggi ahte lea šaddamin njuovvanroassu Finnmárkkus. Dattetge sáhttá dát čoahkkin leat kriisačoahkkin. Norgga Boazosápmelaččaid Riikkasearvvi áirras KRO:s, Per Mathis Oskal, lohká ahte son ii dieđe vuos doarvái lea go dát mihkkege kriisačoahkkimiid.  – Mii áigut čoahkkimis geahččat mo dilli lea njuovahagain ja boazodolliin. Jus lea mihkkege maid mii KRO:s sáhttit dahkat, de mii dahkat dan, muitala Oskal. Árabut álggahan Makkár doaimmaid KRO sáhttá bidjat johtui ii sáhte Oskal vuos vástidit.  – Fertet vuos geahččat makkár vejolašvuođat leat, lohká son. Bohccobiergu TV márkanfievrrideapmi álggahuvvo vahkku 43, golggotmánu 18. beaivvi.  – Jus čájehuvvo ahte lea heajos bohccobiergojohtu, de soaitá ahte mii galggašeimmet álggahit márkanfievrrideami ovdal, lohká Oskal. Ii leat bissehan njuovvama Njuovahateaiggát Kárášjogas ja Vuonnabađas, Tor Åge Pedersen, duođašta ahte johtu ii leat seamma buorre go diibmá.  – Mii njuovvat oalle olu dán jagi, gaskal 15 ja 16 000 bohcco dán rádjái, muhto johtu ii leat nu buorre mo diibmá, ja mii eat nagot njuovvat buot, lohká Pedersen. Eará njuovahagat leat bissehan njuovvama, muhto Pedersen lea sáhttán njuovvat buot mii su njuovahagaide leat boahtán.  – Nu mo mun lean ádden de leat eará njuovahagat bissehan njuovvama, muhto mii eat leat dárbbašan bissánit, muitala son. Son maiddái lasiha ahte dát jahki ii leat erenomáš heittot.  – Diibmá ja mannan jagi lei erenomáš buorre biergofievrrideapmi, nu ahte dát jahki lea dat ii lea dábálaš dásis. Muhto galggašedje leamaš eambo márkanfievrrideami doaimmahit, loahpaha Tor Åge Pedersen. Kurssas Čoahkkin álgá odne diibmu logis. Oasálastit leat Tor Åge Pedersen, gii jođiha njuovahaga, boazodoallohoavda Ellen Inga O. Hætta, Even Nordahl Biergodiehtokantuvrras, Per Mathis Oskal ja Are Smuk Figve NBR:s. Dasa lassin Eanandoallodepartemeantta ovddasteaddji.  Buohkat boazodoallohálddahusas jođihusas ledje kurssas ikte, dattetge ii ožžon Ávvir oktavuođa Ellen Inga O. Hættain.